काठमाडौं । पछिल्लो समय ‘द डार्क फाइल’ अभियान र यसका संस्थापक संयोजक भनिएका राजकुमार तिमल्सिनाको गतिविधि थप शंकास्पद र विवादित बन्दै गएको छ। संस्थापक तिमल्सिनाका अनुसार अभियानका कार्यबाहक संयोजक कञ्चनदास श्रेष्ठ हुन भने तिमल्सिना स्वयं फरार अभियुक्त हुन्।

‘द डार्क फाइल’ का संस्थापक संयोजक राजकुमार तिमल्सिनाले सञ्चारकर्मी निमकान्त पाण्डेसँगको अडियो अन्तर्वार्तामा अभियानको राष्ट्रिय सम्मेलन वैशाख २०, २१ र २२ गते भूमिगत शैलीमा हुने बताएका छन्। अदालतको अवहेलना मुद्दामा दोषी ठहर भइसकेका तिमल्सिना उक्त सम्मेलनपछि अदालत सामु आत्मसमर्पण गर्ने घोषणा समेत गरेका छन्।

प्रविधिको दुरुपयोग र फेक अडियो प्रकरण

नेपालमा पछिल्लो समयमा ‘द डार्क फाइल’ नामक अभियानले प्रविधिको चरम दुरुपयोग गर्दै विभिन्न प्रतिष्ठित व्यक्तिहरूलाई लक्षित गर्दै नक्कली अडियो, तोडमोड गरिएका कागजातहरू, र गलत समाचारहरू सार्वजनिक गर्ने गरेको छ। तिमल्सिनाले सर्वोच्च अदालतका न्यायाधीश आनन्दमोहन भट्टराई, वरिष्ठ अधिवक्ता हरि उप्रेती, कान्तिपुर मिडिया ग्रुपका अध्यक्ष कैलाश सिरोहिया, अन्नपूर्ण मिडिया नेटवर्कका अध्यक्ष रामेश्वर थापा लगायतका व्यक्तिहरूको नक्कली अडियो तयार गरी ‘द डार्क फाइल’ नामक अभियानमार्फत सार्वजनिक गरेका थिए। यस घटनापछि अदालतले उक्त अडियो फेक भएको पुष्टि गर्दै तिमल्सिनालाई दोषी ठहर गरेको थियो।

उजुरीका नाममा आतंक

‘द डार्क फाइल’ अभियान पुर्व गृहमन्त्री तथा रास्वपा सभापति रवि लामिछानेको छाँया अभियानको भएको आरोप लागिरहेको बेला राजकुमार तिमल्सिनाले पछिल्लो समय रास्वपा उपसभापति डा. स्वर्णिम वाग्लेविरुद्ध अख्तियार दुरुपयोग अनुसन्धान आयोगमा उजुरी दिएका छन्। वाग्ले पार्टी फुटाउने चलखेलमा संलग्न रहेको आरोप लागिरहेकै बेला उनको विरुद्ध उजुरी दर्ता हुनु संयोग मात्र नभई योजनाबद्ध चलखेल भएको पार्टीभित्रै चर्चा हुन थालेको छ। रवि लामिछानेले बिगतमा रिसिइबी साँधेका ब्यक्तिहरु विरुद्ध उजुरी दर्ता गरेर सामाजिक संजाल मार्फत सनसनी फैलाउन खोज्नुले पनि डार्क फाइल अभियान रवि लामिछानेको छाँया अभियान हो भन्ने पुष्टि भएको जानकारहरु बताउँछन् ।

अन्तर्वार्तामा तिमल्सिनाले अहिलेसम्म भएका सबै राष्ट्रिय योजना आयोगका उपाध्यक्षहरू विरुद्ध मुद्दा दायर गर्ने योजना बनाएको समेत बताएका छन्। साथै, उनले नेपाली कांग्रेसका महामन्त्री गगन थापा सहित ३३ जनाको विरुद्ध सम्पत्ति शुद्धीकरण मुद्दा दर्ता भइसकेको दाबी गरेका छन्।

कानुनी संरक्षणको प्रश्न

कानूनी रूपमा राजकुमार तिमल्सिना अपराधी हुन्, र उनी हाल फरार रहेका छन्। तर, उनी नै विभिन्न व्यक्तिहरू विरुद्ध राष्ट्र बैंक, सम्पत्ति शुद्धीकरण विभाग, तथा अख्तियार दुरुपयोग अनुसन्धान आयोग लगायतका निकायहरूमा उजुरी दर्ता गराइरहेका छन्। यस्ता उजुरीहरूमा प्रायः कुनै ठोस प्रमाण नभेटिए पनि आरोपहरू भने गम्भीर प्रकृतिका हुने गरेका छन्।

विभिन्न प्रतिष्ठित व्यक्तिहरूको चरित्र हत्या गर्न मात्र उजुरी दर्ता गर्ने प्रवृत्ति देखिएको जानकारहरू बताउँछन्। प्रहरीको उच्च निगरानी रहने निकायहरूमा समेत अदालतले सजाय तोकेका तिमल्सिना स्वयंले सहजै उजुरी दर्ता गराइरहेको देख्दा उनलाई बलियो राजनीतिक संरक्षण रहेको संकेत गर्छ।

यसरी प्रविधिको दुरुपयोग गर्दै गलत सूचना प्रवाह गर्ने कार्यले समाजमा भ्रम सिर्जना गर्नुका साथै निर्दोष व्यक्तिहरूको प्रतिष्ठामा आँच पुर्‍याउने खतरा बढाएको छ। सामाजिक सञ्जाल र डिजिटल माध्यमहरूको सही उपयोग गर्दै यस्ता गतिविधिहरूलाई निरुत्साहित गर्न सबै पक्ष सचेत रहन सरकारले निरन्तर आव्हान गर्दै आएको छ।

प्रकाशित मिति: १९ चैत्र २०८१, बुधबार

ग्लोबल नागरिक संवाददाता

'हामी जे देख्छौं, त्यही लेख्छौं र देखाउछौं'
सत्य-तथ्य निष्पक्ष ताजा समाचार'

यो खबर पढेर तपाईलाई कस्तो महसुस भयो ?


स्रोतहरू खुलाइएका बाहेक ग्लोबल नागरिकमा प्रकाशित सम्पूर्ण सामग्रीहरू ग्लोबल जर्नालिस्ट ग्रुपका सम्पत्ति हुन् । यसमा प्रकाशित कुनै पनि सामग्रीहरू छापा, विद्युतीय, प्रसारण वा अन्य कुनै पनि माध्यमबाट पुनःप्रकाशन वा प्रसारण गर्नुअघि अनुमति लिनुहुन अनुरोध छ ।

©2025 GlobalNagarik All rights reserved. | Website by Appharu.com