काठमाडौं । प्रभु बैंकका प्रमुख कार्यकारी अधिकृत (सिईओ) अशोक शेरचनको कार्यकाल आगामी २०८२ साल बैशाख ९ गते समाप्त हुने भएको छ। उच्च अदालत पाटनले गरेको फैसलाअनुसार, बैंक तथा वित्तीय संस्था ऐन (बाफिया) २०७३ अनुसार कुनै पनि व्यक्तिले अधिकतम दुई कार्यकाल अर्थात् आठ वर्षसम्म मात्र सिईओ पदमा रहन सक्ने व्यवस्था छ।
प्रभु बैंकले सेञ्चुरी कमर्सियल बैंकलाई प्राप्ती गरेपछि सञ्चालक समितिले शेरचनलाई २०७९ माघ १२ गतेदेखि लागु हुने गरी तेस्रो कार्यकाल अर्थात ४ वर्षका लागि सीईओ नियुक्त गरेको थियो । जसअनुसार उनले २०८३ माघ ११ गतेसम्म सीईओ रुपमा काम गर्न पाउने थिए । तर, शेरचन विरुद्ध उच्च अदालत पाटनमा परेको मुद्दाको अन्तिम फैसलाको पूर्णपाठ अनुसार उनले आफ्नो थपिएको कार्यकालभरी काम गर्न नपाउने भएका हुन् ।
अदालतले पुर्णपाठमा भनेको छ ‘बाफियाको दफा २९ को उपदफा (२) मा एक कार्यकाल चार वर्षको हुने र २ कार्यकालसम्म काम गर्न पाउने देखिँदा प्रस्तुत ऐन प्रारम्भ भएको मिति २०७४/०१/१० देखि गणना हुने गरी विपक्षी अशोक शेरचन बैंकको कार्यकारी प्रमुख पदमा ८ वर्षसम्म अर्थात २०८२/०१/०९ सम्म काम गर्न सक्षम र योग्य देखिन्छ ।’
अधिवक्ता अनिता थापा के.सी. ले २०७९ माघमा उच्च अदालतमा दायर गरेको मुद्दा जितेपनी अदालतको पुर्णपाठ आएपछि २०८१ श्रावण १३ गते सिईओ शेरचन सर्बोच्च अदालत गएका थिए। प्रभु बैंक सञ्चालन समिती, प्रभु बैंक केन्द्रिय कार्यलय सहित सिईओ शेरचन तेस्रो कार्यकाल पूरा अबधि काम गर्न पाउनुपर्ने माग राख्दै उच्च अदालतको फैसला विरुद्ध उनै अधिवक्ता अनिता थापा केसीलाई प्रतिबादी बनाएर सर्बोच्च अदालत गएका हुन्। उनको मुद्दाको पेशी यहि चैत २२ गते शुक्रबारको लागि तोकिएको छ। सर्बोच्च बाट जसरी पनि मुद्दा जित्छु भन्दै हिडेका शेरचनको पक्षमा फैसला नगरे २०८२ बैशाख ९ गतेबाट सिईओको रुपमा काम गर्न पाउने छैनन्।
यसैबीच, प्रभु बैंकले सार्वजनिक गरेको आर्थिक विवरणअनुसार बैंकको सञ्चालन खर्च २३.४६ प्रतिशतले बढेर ६ अर्ब ७२ लाख रुपैयाँ पुगेको छ, जुन अघिल्लो वर्षको तुलनामा उल्लेखनीय वृद्धि हो। आर्थिक वर्ष २०८०/८१ मा बैंकको खुद नाफा ५१ करोड ८ लाख रुपैयाँ रहेको बैंकका तिनै सिईओ शेरचनको लाचारी, अनियमितता र स्वार्थले एकै वर्षमा बैंकको मुद्दा मामिला खर्च मात्रै ४६ करोड ४ लाख ३१ हजार ६०२ देखिएको छ।
२०८०/०८१ मा बैंकको खुद नाफा र मुद्दा मामिला खर्च लगभग बराबर देखिनुले बैंकमा चरम आर्थिक अनियमितता भएको भन्दै शेयरधनिहरुले चर्को बिरोध गर्दै आएका छन्। विश्लेषकहरुका अनुसार सिईओ शेरचनको कार्यकाल बैशाखमा सकिएपछी प्रभु बैंकले सकारात्मक गति लिने विश्वास ब्यक्त गरेका छन्।
प्रकाशित मिति: १९ चैत्र २०८१, बुधबार
प्रतिक्रिया