काठमाडौं । नेकपा एकीकृत समाजवादी र नेकपा माओवादी केन्द्रले चुनावअघि नै पार्टी एकता गर्ने तयारी गरेका छन् । पछिल्लो समय माओवादी केन्द्र र एकीकृत समाजवादीका नेताहरुबीच चुनावअघि नै पार्टी एकता गर्ने विषयमा भएको छलफल सकारात्मक रहेको माओवादी केन्द्रका एक नेताहरुले ग्लोबल नागरिकलाई बताएका छन्।
यसअघि कांग्रेस बाहेक सत्ता गठबन्धनमा रहेका दलहरुले छुट्टै गठबन्धन बनाउने विषयमा कुराकानी अघि बढाएका थिए । अहिले उनीहरुको संवाद चुनावअघि कम्तीमा माओवादी केन्द्र र नेकपा एकीकृत समाजवादीबीच एकता गरेर अघि बढ्ने बिषयमा केन्द्रित भएको जनाएको छ ।
आइतबार तत्कालिन नेकपाका पाँच जना सचिवालय सदस्यहरु नेकपा माओवादी केन्द्रका अध्यक्ष पुष्पकमल दाहाल प्रचण्ड र नारायणकाजी श्रेष्ठ, नेकपा एकीकृत समाजवादीका अध्यक्ष माधवकुमार नेपाल र नेता झलनाथ खनाल र भर्खरै नेकपा एकता राष्ट्रिय अभियान खोलेर त्यसको संयोजक बनेका वामदेव गौमतबीच छलफल भएको थियो । उक्त छलफलमा चुनावअघि दुई पार्टीको एकता गर्ने विषयमा सहमत भएको माओवादी केन्द्रका नेता नारायणकाजी श्रेष्ठले जानकारी दिए ।
‘छलफलमा सकेसम्म चुनावअघि नै दुई पार्टीबीच एकता गर्ने, एकता संभव भएन भने संयोजन समिति बनाएर अघि बढ्ने भन्ने कुरा भएको छ’, नेता श्रेष्ठले ग्लोबल नागरिकसंग भने ।
प्रकाशित मिति: २० असार २०७९, सोमबार
प्रतिक्रिया