काठमाडौं । लमजुङको मध्यनेपाल नगरपालिकाले बुधबार स्थानीयस्तरमा सार्वजनिक बिदा दिएको छ । नगरपालिकाले एक विज्ञप्ति जारी गर्दै जातीय भेदभाव तथा छुवाछूत उन्मुलन राष्ट्रिय दिवसका अवसरमा नगरपालिकाभित्र सार्वजनिक बिदा दिइएको जानकारी दिएको हो ।
भेदभाव तथा छुवाछूत उन्मूलनमा नगरपालिकाको तर्फबाट पूर्ण प्रतिबद्धता व्यक्त गर्दै पालिकाअन्तर्गत अत्यावश्यक सेवाबाहेकका सबै निकायमा सार्वजनिक बिदा दिइएको विज्ञप्तिमा उल्लेख छ । नगरभित्र बसोवास गर्ने सम्पूर्ण दलित तथा उत्पीडित समुदायको भावनालाई आत्मसाथ गर्दै सार्वजनिक बिदा दिइएको मध्यनेपाल नगरपालिका प्रमुख रमेशकुमार पाण्डेले जानकारी दिए ।
नगरप्रमुख पाण्डेद्वारा हस्ताक्षरित सूचनामा नगर कार्यपालिकाअन्तर्गतका सम्पूर्ण कार्यालयहरू, सामुदायिक एवं निजी शैक्षिक संस्था, अत्यावश्यक सेवाबाहेकका स्वास्थ्य संस्था र अन्य संघ संस्थाहरूमा स्थानीय सार्वजनिक बिदा दिएको जनाइएको छ ।
प्रकाशित मिति: २१ जेष्ठ २०८२, बुधबार
प्रतिक्रिया