काठमाडौँ । राष्ट्रिय प्रजातन्त्र पार्टी (राप्रपा)का वरिष्ठ नेता तथा पदाधिकारीहरूले उपाध्यक्ष मुकुन्दश्याम गिरीलाई पार्टी विधानविपरीत पदमुक्त गरिएको भन्दै गम्भीर असन्तुष्टि जनाएका छन्।
उपाध्यक्ष विक्रम पाण्डे, महामन्त्री डा. धवल शम्सेर राणा र महामन्त्री कुन्ती कुमारी शाहीले संयुक्त विज्ञप्ति जारी गर्दै गिरीलाई कुनै स्पष्टीकरणको अवसर नदिई हटाइएको निर्णय अस्वीकार्य रहेको बताएका छन्।
“यो स्वेच्छाचारी निर्णयले पार्टीको प्रजातान्त्रिक चरित्रमा आँच पुर्याउनुका साथै आन्तरिक एकता र विधिको शासनमा बाधा पुगेको छ,” विज्ञप्तिमा उल्लेख गरिएको छ।
नेतात्रयले गिरीले पार्टी हितमा समर्पित रहेर काम गर्दै आएको र पछिल्लो महाधिवेशनयता महत्त्वपूर्ण भूमिका निर्वाह गर्दै आएको स्मरण गराउँदै पार्टी नेतृत्वलाई उक्त निर्णय तत्काल सच्याउन माग गरेका छन्।
“देशभरका राप्रपाका कार्यकर्ता र शुभेच्छुकहरू यो निर्णयबाट दुखित र चिन्तित छन्,” उनीहरूले बताएका छन्।
विज्ञप्तिमा पार्टी नेतृत्वलाई आत्ममूल्यांकन गर्दै गिरीलाई पुनः पूर्ववत् पदमा reinstatement गर्न आग्रह गरिएको छ। साथै, सबै पार्टी नेता, कार्यकर्ता र समर्थकलाई पार्टीको आदर्श र सिद्धान्तप्रति प्रतिबद्ध रही एकतामा जोड दिन आह्वान गरिएको छ।
नेताहरूले यो समय पार्टीभित्र विश्वास र संवादको वातावरण निर्माण गर्दै साझा हितमा अघि बढ्नुपर्ने चुनौतीको रूपमा लिनुपर्ने धारणा पनि व्यक्त गरेका छन्।
प्रकाशित मिति: ४ श्रावण २०८२, आइतबार
प्रतिक्रिया