काठमाडौं । गृह मन्त्रालयले निर्वाचन ऐन संशोधनका लागि अध्यादेश ल्याउने तयारी थालेको छ।
यसअघि निर्वाचन आयोगले १६ वर्ष पुगेका नागरिकलाई मतदान गर्न दिने प्रावधानसहितको संशोधन प्रस्ताव सरकारलाई पठाएको थियो। सोही आधारमा गृह मन्त्रालयले आवश्यक गृहकार्य अघि बढाइरहेको हो।
निर्वाचन आयोगका प्रवक्ता नारायणप्रसाद भट्टराईका अनुसार आयोगले प्रस्ताव पठाएपछि त्यसबारे निर्णय गर्ने अधिकार सरकारले नै प्रयोग गर्नेछ। उनले भने, ‘आयोगले सुझाव पेस गरिसकेकाले अब सरकारको पहलमा प्रक्रिया अघि बढ्छ।’
गृह मन्त्रालय स्रोतका अनुसार अघिल्लो मन्त्रिपरिषद् बैठकमा नै अध्यादेश ल्याउने तयारी भए पनि विदेशमा रहेका नेपालीलाई मताधिकार दिने विषयमा थप छलफल आवश्यक ठहरिएपछि रोकिएको थियो।
हाल थप तयारीसहित निर्वाचन ऐन संशोधनका लागि अध्यादेश ल्याउने गृह मन्त्रालयको कार्ययोजना अगाडि बढाइएको छ।
प्रकाशित मिति: ७ आश्विन २०८२, मंगलबार
प्रतिक्रिया