काठमाडौं । राष्ट्रिय स्वतन्त्र पार्टी (रास्वपा) का संस्थापक केन्द्रीय सदस्य डा. प्रभात अधिकारीले पदबाट राजीनामा दिएका छन् । उनले शुक्रबार पार्टीलाई राजीनामा पत्र बुझाएको रास्वपाका एक नेताले जानकारी दिएका छन् ।
उक्त नेताका अनुसार अधिकारीले पदप्रति कुनै मोह नराखी स्वेच्छाले राजीनामा दिएका हुन् । उनले भने, ‘डा. अधिकारीज्यू संस्थापक केन्द्रीय सदस्य हुनुहुन्छ । उहाँ पदको लोभ गर्ने व्यक्तित्व होइन । रास्वपामा समृद्धि र विकासको सम्भावना देखेर जोडिनु भएको थियो, तर अहिले कुनै आरोप–प्रत्यारोप नगरी शान्तिपूर्वक राजीनामा दिनु भएको हो ।’
यसअघि, जेनजी आन्दोलनपछि पूर्व सहमहामन्त्री सुमना श्रेष्ठ र केन्द्रीय सदस्य हरि भट्टले समेत पदबाट राजीनामा दिएका थिए ।
पार्टी छाड्नेहरुलाई पुनः फर्काउने विषयमा हालै सम्पन्न दुईदिने केन्द्रीय समिति बैठकमा पनि छलफल भएको थियो । केही नेताहरूले कार्यदल बनाएर संवादमार्फत फर्काउने पहल गर्नुपर्ने सुझाव दिएका थिए ।
प्रकाशित मिति: १० आश्विन २०८२, शुक्रबार
प्रतिक्रिया