महानगरको जिम्मेवारी छोड्दै बालेन

काठमाडौं । काठमाडौँ महानगरपालिकाका मेयर बालेन्द्र शाह (बालेन)ले पदबाट राजीनामा दिने तयारी गरेका छन्। प्रतिनिधिसभा निर्वाचनमा राष्ट्रिय स्वतन्त्र पार्टी (रास्वपा)को तर्फबाट प्रधानमन्त्री पदका उम्मेदवार बन्ने सहमति भएपछि उनले महानगरको जिम्मेवारी छोड्न लागेका हुन्।

आज बिहान मेयर बालेन र रास्वपा सभापति रवि लामिछानेबीच बालेनलाई रास्वपाबाट चुनाव लडाउने र प्रधानमन्त्रीको उम्मेदवार बनाउने विषयमा सहमति भएको स्राेतले बताएकाे छ। कानुनी प्रावधानअनुसार उम्मेदवार बन्न माघ ६ गतेभित्र महानगर प्रमुख पदबाट राजीनामा दिनुपर्ने बाध्यता रहेको छ।

महानगरमा बालेनको कार्यकाल अझै करिब १६ महिना बाँकी रहे पनि उम्मेदवारीको तयारीका कारण उनले आगामी दुई हप्ताभित्र पद त्याग्ने तयारी गरेका हुन्।

मेयरका प्रमुख स्वकीय सचिव भूपदेव शाहका अनुसार केही बाँकी कामहरू टुंग्याएर प्राविधिक तथा राजनीतिक पक्षको मूल्यांकनपछि उपयुक्त समयमा राजीनामा दिइनेछ। उनका अनुसार राजीनामा प्रक्रिया करिब दुई हप्ताभित्रै सम्पन्न हुने सम्भावना रहेको छ।

प्रकाशित मिति: १३ पुस २०८२, आइतबार