वासिङ्टन डीसी। अमेरिकी विदेशमन्त्री मार्को रुबियोले भेनेजुएलाको अन्तरिम नेतृत्व अमेरिकी अपेक्षा र लक्ष्यबाट विचलित भएमा ट्रम्प प्रशासनले भविष्यमा सैन्य विकल्पसमेत प्रयोग गर्न सक्ने चेतावनी दिएका छन्।
बुधबार सिनेटको विदेश सम्बन्ध समितिमा प्रस्तुत गर्न तयार पारिएको सुनुवाइमा रुबियोले अमेरिका भेनेजुएलासँग युद्धको अवस्थामा नरहेको स्पष्ट पार्दै, आवश्यक परे बल प्रयोगको विकल्प अस्वीकार नगरिने संकेत गरेका हुन्। “अन्य सबै उपाय असफल भएमा अधिकतम दबाब सुनिश्चित गर्न हामी बल प्रयोग गर्न तयार हुन सक्छौँ,” विदेश मन्त्रालयले सार्वजनिक गरेको उनको वक्तव्यमा उल्लेख छ। तर यस्तो अवस्था नआओस् भन्ने नै अमेरिकाको प्राथमिकता रहेको उनले जोड दिए।
उनका अनुसार यसै महिनाको सुरुआतमा पूर्वराष्ट्रपति निकोलस मदुरोलाई पक्राउ गर्ने उद्देश्यले गरिएको छापापछि पनि अमेरिका सतर्क अवस्थामा छ। रुबियोले भेनेजुएलाविरुद्ध कुनै युद्ध नभएको र त्यहाँ अमेरिकी सैनिकहरू भूमिमा तैनाथ नरहेको दाबी गरे।
फ्लोरिडाका पूर्व सिनेटरसमेत रहेका रुबियो राष्ट्रपति डोनाल्ड ट्रम्पका विदेश नीतिहरू कंग्रेससमक्ष स्पष्ट पार्ने भूमिकामा छन्। पश्चिमी गोलार्ध, युरोप र मध्यपूर्व केन्द्रित नीतिबारे आफ्नै पार्टीभित्र उठेका चिन्तालाई सम्बोधन गर्नु उनको प्रमुख चुनौती बनेको छ।
भेनेजुएलासम्बन्धी सुनुवाइमा रुबियोले लागुऔषध तस्करीको आरोपमा मदुरोलाई हटाउने निर्णयको बचाउ गरेका छन्। उनले समुद्री मार्गबाट हुने लागुऔषध तस्करीमा संलग्न डुङ्गामाथि गरिएको कारबाही तथा प्रतिबन्धित तेल ट्याङ्कर कब्जा गर्ने कदम कानुनी दायराभित्र रहेको बताए।
यद्यपि कंग्रेसका डेमोक्रेट सदस्यहरूले यी कदमलाई कार्यकारी अधिकारको अतिक्रमण भएको भन्दै आलोचना गरेका छन्। युद्ध शक्ति ऐनअन्तर्गत अमेरिकी सेना फिर्ता बोलाउने प्रस्ताव प्रतिनिधिसभामा अल्पमतले अस्वीकृत भएको थियो। प्रशासनका अनुसार ठूलो सैन्य तयारी देखिए पनि भेनेजुएलाको भूमिमा अमेरिकी सेना तैनाथ छैन।
यसबीच ट्रम्प प्रशासनले भेनेजुएलासँग सम्बन्ध सामान्य बनाउने प्रयास पनि अघि बढाएको छ। अमेरिकी अधिकारीहरूले कार्यवाहक राष्ट्रपति डेल्सी रोड्रिगेजसँग संवाद तीव्र बनाएका छन्। रुबियोले रोड्रिगेज ट्रम्प प्रशासनका मागबारे जानकार रहेको र ती माग पूरा गर्नु नै उनको हितमा हुने विश्वास व्यक्त गरेका छन्।
अमेरिकाका प्रमुख मागहरूमा भेनेजुएलाको ऊर्जा क्षेत्र अमेरिकी कम्पनीका लागि खोल्ने, तेलबाट प्राप्त राजस्व अमेरिकी सामान खरिदमा प्रयोग गर्ने र क्युबालाई दिइँदै आएको सहुलियतपूर्ण तेल आपूर्ति बन्द गर्ने विषय समावेश छन्।
यसैबीच, रोड्रिगेजले दुवै पक्षबीच सम्मानजनक संवाद च्यानल स्थापना भएको बताएका छन्। पछिल्ला हप्तामा भेनेजुएलाले सयौँ राजनीतिक बन्दीहरू रिहा गरेको जनाइएको छ, जसको अमेरिकी राष्ट्रपति ट्रम्पले सार्वजनिक रूपमा प्रशंसा गरेका छन्।
कूटनीतिक सम्बन्ध पुनःस्थापनातर्फ महत्त्वपूर्ण कदमस्वरूप अमेरिकी विदेश मन्त्रालयले कारकासस्थित अमेरिकी दूतावास पुनः खोल्ने तयारी थालेको जानकारी कंग्रेसलाई दिएको छ। सन् २०१९ देखि बन्द रहेको दूतावास पुनः सञ्चालन गर्ने यो पहिलो औपचारिक संकेत मानिएको छ। यद्यपि सम्बन्ध पूर्ण रूपमा सामान्य बनाउन अझै कानुनी र राजनीतिक प्रक्रिया बाँकी रहेको अमेरिकी पक्षले जनाएको छ।
यस क्रममा रुबियोले भेनेजुएलाकी विपक्षी नेतृ मारिया कोरिना मचाडोलाई विदेश मन्त्रालयमा भेट्ने तयारीसमेत गरेका छन्। मदुरोलाई हटाइएपछि वासिङ्टन आएकी मचाडोले हालै ट्रम्पसँग भेट गरी आफ्नो नोबेल शान्ति पुरस्कार पदक उपहार दिएको विषयलाई अमेरिकी राजनीतिक वृत्तमा अर्थपूर्ण संकेतका रूपमा हेरिएको छ।
प्रकाशित मिति: १४ माघ २०८२, बुधबार
प्रतिक्रिया