काठमाडौं। इरानका सभामुख मोहम्मद बाघेर कालिबाफले आइतबार इरानले अब सबै युरोपेली सङ्घ (इयु) का सेनालाई आतङ्कवादी समूह मानेको घोषणा गरेका छन्।
यो निर्णय इयुले इरानको अर्धसैनिक क्रान्तिकारी गार्डलाई आतङ्कवादी समूह घोषणा गरेपछि आएको प्रतिक्रिया हो। इयुको घोषणा देशभरी विरोध प्रदर्शनमाथि भएको दमनसँग सम्बन्धित छ।
पूर्व गार्ड कमाण्डर समेत रहनुभएका कालिबाफले यो घोषणा प्रतीकात्मक हुने सम्भावना बढी रहेको बताएका छन्। सन् २०१९ मा संयुक्त राज्य अमेरिकाले क्रान्तिकारी गार्डलाई आतङ्कवादी घोषणा गरेपछि इरानले त्यही कानून प्रयोग गर्दै अन्य राष्ट्रका सेनालाई पनि सूचीमा राख्ने व्यवस्था गरेको स्मरण गराइएको छ।
इरानले पर्सियन खाडीको होर्मुज जलडमरूमध्यमा आइतबार र सोमबार प्रत्यक्ष फायर सैन्य अभ्यास गर्ने योजना बनाएको छ। यहाँ विश्व तेल व्यापारको करिब पाँचौँ भाग आवागमन हुन्छ।
कालिबाफका अनुसार “युरोपमा आतङ्कवाद फैलिन नदिने सबैभन्दा ठुलो बाधा बनेको गार्डमाथि आक्रमण गर्दा युरोपेलीहरूले आफ्नै खुट्टामा गोली हानेका छन्।” संसद् बैठकमा सांसदहरूले ‘अमेरिका मूर्दावाद’ र ‘इजरायल मूर्दावाद’ नारा लगाएका थिए।
यसैबीच अमेरिकी राष्ट्रपति डोनाल्ड ट्रम्पले इरानविरुद्ध सम्भावित सैन्य कारबाहीका सर्तहरू अघि राखेका छन्। उनका अनुसार, शान्तिपूर्ण प्रदर्शनकारीको हत्या वा सामूहिक मृत्युदण्डको अवस्था सिर्जना भएमा कारबाही हुनेछ। उनले इरानको आणविक कार्यक्रमबारे पनि चासो व्यक्त गरेका छन्।
इरानका वरिष्ठ सुरक्षा अधिकारी अली लारिजानीले सामाजिक सञ्जालमा वार्ताका लागि संरचनात्मक तयारी अघि बढेको बताएका छन्। तर सर्वोच्च नेता अयातुल्ला अली खामेनीले प्रत्यक्ष वार्ता अस्वीकार गर्दै आएका छन्।
प्रकाशित मिति: १८ माघ २०८२, आइतबार
प्रतिक्रिया