चितवन । चितवनको भरतपुरमा निर्वाचन आचारसंहिताविपरीत गतिविधि गर्दै आएका दुई जनालाई प्रहरीले पक्राउ गरेको छ।
जिल्ला प्रहरी कार्यालय चितवनका अनुसार बिहीबार मध्यान्न १२:०५ बजे भरतपुर–१० स्थित नारायणी नमुना माध्यमिक विद्यालय मतदान केन्द्र बाहिर उनीहरूलाई नियन्त्रणमा लिइएको हो।
पक्राउ परेकामा नेकपा बहुमतका चितवन जिल्ला सचिव २९ वर्षीय सुमन श्रेष्ठ र सोही पार्टी निकट विद्यार्थी संगठनका जिल्ला संयोजक २१ वर्षीय किरण गौतम रहेका छन्।
सुमन श्रेष्ठ धादिङको गल्छी गाउँपालिका–१ का स्थायी बासिन्दा हुन् र हाल भरतपुर–७ मा बस्दै आएका छन्। किरण गौतम चितवनको कालिका नगरपालिका–४ का स्थायी बासिन्दा हुन्।
जिल्ला प्रहरी कार्यालयका सूचना अधिकारी प्रहरी नायब उपरीक्षक रवीन्द्र खनालका अनुसार, पक्राउ परेकामाथि थप छानबिन र आवश्यक अनुसन्धान जारी रहेको छ।
प्रहरीले निर्वाचनको समयमा शान्ति–सुरक्षा कायम राख्न र आचारसंहिता उल्लंघन गर्नेविरुद्ध कडा निगरानी जारी रहेको जानकारी दिएको छ।
प्रकाशित मिति: २१ फाल्गुन २०८२, बिहिबार
प्रतिक्रिया