तेहरान। अमेरिकाद्वारा गरिएको पछिल्लो सैन्य आक्रमणपछि दुई देशबीचको सम्भावित वार्ताबारे इरानले पुनरावलोकन गरिरहेको जनाएको छ ।
इरानी विदेश मन्त्रालयका प्रवक्ता इस्माइल बघाईले अमेरिकी आक्रमणको पृष्ठभूमिमा तेहरानले वार्ताको अवस्थालाई पुनः समीक्षा गरिरहेको बताएका छन् ।
उनले अमेरिकाले विरोधाभासी सन्देश, आफ्नो अडान तथा मागहरूमा बारम्बार परिवर्तन र युद्धविराम उल्लङ्घनमार्फत वार्ताको वातावरण कमजोर बनाइरहेको आरोप लगाए ।
बघाईले लेबनानमाथि पटक–पटक आक्रमण गरेर इजरायलले पनि सद्भावनाको अभाव देखाएको दाबी गरे ।
पछिल्लो घटनाक्रममा अमेरिकाले आफ्नो एक सैन्य हेलिकप्टर खसालिएको घटनाको जवाफस्वरूप इरानविरुद्ध सैन्य कारबाही गरेको जनाएको छ । अमेरिकी सेनाले आक्रमण सफलतापूर्वक सम्पन्न भएको दाबी गरेको छ ।
यसको प्रतिउत्तरमा इरानले क्षेत्रीय अमेरिकी लक्ष्यहरूलाई निशाना बनाएर जवाफी आक्रमण गरेको जनाएको छ ।
दुवै पक्षबीचको सैन्य तनाव बढ्दै जाँदा पश्चिम एसियामा थप अस्थिरता उत्पन्न हुने चिन्ता बढेको छ ।
प्रकाशित मिति: २७ जेष्ठ २०८३, बुधबार
प्रतिक्रिया