काठमाडौं । बागमती प्रदेशमा एमाले नेता किरण थापालाई मुख्यमन्त्री बनाउन समर्थन गरेपछि राष्ट्रिय प्रजातन्त्र पार्टी (राप्रपा)भित्र विवाद चर्किएको छ।
राप्रपा केन्द्रीय नेतृत्वको निर्देशनविपरीत प्रदेश संसदीय दलले एमाले नेतृत्वको सरकारलाई समर्थन गरेपछि केन्द्र र प्रदेश संसदीय दलबीच टकराव बढेको हो।
राप्रपाले यसअघि कुनै पनि सरकारलाई समर्थन नगर्न प्रदेश संसदीय दललाई निर्देशन दिएको थियो। तर संसदीय दलका नेता उद्धव थापाले एमालेका मुख्यमन्त्रीका दाबेदार किरण थापालाई समर्थन गरेपछि अध्यक्ष राजेन्द्र लिङदेनले असन्तुष्टि जनाउँदै कारबाहीको चेतावनी दिएका छन्।
लिङदेनले प्रदेश प्रमुखलाई पत्र पठाउँदै राप्रपाको तर्फबाट एमाले उम्मेदवारलाई समर्थन नरहेको स्पष्ट गरिसकेका छन्।
विवादबारे निर्णय लिन राप्रपाले बिहीबार बिहान ११ बजे अनुशासन समितिको बैठक र त्यसपछि दिउँसो १२ बजे केन्द्रीय कार्यसम्पादन समितिको बैठक बोलाएको प्रवक्ता मोहनकुमार श्रेष्ठले जानकारी दिएका छन्।
यसअघि नै पार्टीले संसदीय दलका नेता उद्धव थापालाई १२ घण्टाभित्र स्पष्टीकरण बुझाउन निर्देशन दिएको थियो।
तर उद्धव थापाले भने प्रदेशमा राप्रपाको समर्थन कायम रहेको दाबी दोहोर्याएका छन्।
यससँगै बागमतीमा मुख्यमन्त्री चयनको विषयलाई लिएर सुरु भएको विवाद राप्रपाको आन्तरिक अनुशासन र नेतृत्वबीचको टकरावतर्फ मोडिएको छ।
प्रकाशित मिति: ४ भाद्र २०८३, बिहिबार
प्रतिक्रिया