काठमाडौं । नेपाली चलचित्र ‘तिनीहरू’ ९९औँ एकाडेमी अवार्ड्स (अस्कर) को ‘उत्कृष्ट अन्तर्राष्ट्रिय फिचर फिल्म’ विधामा नेपालको आधिकारिक प्रतिनिधिका रूपमा सिफारिस भएको छ। फिल्म अस्करको दौडमा प्रवेश गरेसँगै प्रधानमन्त्री बालेन्द्र शाहले निर्माण टोलीलाई बधाई तथा सफलताको शुभकामना दिएका छन्।
अविनाश विक्रम शाहको निर्देशन तथा अन्वेषण अधिकारीको निर्माणमा बनेको ‘तिनीहरू’लाई नेपाल अन्तर्राष्ट्रिय फिचर फिल्म छनोट समितिले ‘गौंथली’सहितका आवेदकमध्येबाट छनोट गरेको हो। समितिले प्राविधिक सबलता, कथावस्तुको प्रस्तुति, पात्रहरूको भावनात्मक गहिराइ र कलात्मक पक्षको मूल्याङ्कन गर्दै फिल्मलाई अस्करका लागि सिफारिस गरेको जनाएको छ।
फिल्मले नेपालको तराई क्षेत्रको सामाजिक परिवेशमा यौनिक तथा लैङ्गिक अल्पसङ्ख्यक समुदायका पात्रहरूको जीवन, संघर्ष, सम्बन्ध र आत्मसम्मानको खोजलाई कथाको केन्द्रमा राखेको छ। समाजको सीमान्तमा पारिएका पात्रहरूको जीवनलाई मानवीय दृष्टिकोणबाट प्रस्तुत गर्नु फिल्मको प्रमुख विशेषता हो।
निर्देशक अविनाश विक्रम शाह नेपाली चलचित्रमा फरक सामाजिक विषय र संवेदनशील कथालाई कलात्मक ढङ्गले प्रस्तुत गर्ने फिल्मकर्मीका रूपमा परिचित छन्। ‘तिनीहरू’ उनको निर्देशनमा बनेको महत्वपूर्ण फिचर फिल्म हो, जसले नेपाली समाजमा कम सुनिएका पात्र र कथालाई अन्तर्राष्ट्रिय चलचित्र मञ्चसम्म पुर्याएको छ।
‘तिनीहरू’ले यसअघि नै अन्तर्राष्ट्रिय मञ्चमा उल्लेखनीय सफलता हासिल गरिसकेको छ। फिल्मले प्रतिष्ठित कान्स फिल्म फेस्टिभलमा जुरी अवार्ड जित्दै नेपाली चलचित्रका लागि महत्वपूर्ण उपलब्धि हासिल गरेको थियो। त्यसैगरी, एसिया प्यासिफिक स्क्रिन अवार्ड्समा समेत फिल्म विभिन्न विधामा मनोनयनमा परेको थियो।
अस्करमा नेपालको प्रतिनिधित्वका लागि छनोट हुनु ‘तिनीहरू’को अन्तर्राष्ट्रिय यात्राको अर्को महत्वपूर्ण चरण हो। फिल्मको छनोट सार्वजनिक भएपछि प्रधानमन्त्री शाहले सामाजिक सञ्जालमार्फत निर्देशक, निर्माता तथा सम्पूर्ण निर्माण टोलीलाई बधाई दिँदै अस्कर यात्राका लागि शुभकामना दिएका हुन्।
प्रकाशित मिति: २८ भाद्र २०८३, आइतबार
प्रतिक्रिया