काठमाडौं । नेपाली कांग्रेसका पूर्वसभापति शेरबहादुर देउवा १५औँ महाधिवेशनका लागि डडेल्धुराबाट सर्वसम्मत क्षेत्रीय प्रतिनिधि चयन भएका छन्।
डडेल्धुराको गन्यापधुरा गाउँपालिका–१ मा सम्पन्न कांग्रेसको वडा अधिवेशनबाट देउवा सर्वसम्मत रूपमा क्षेत्रीय प्रतिनिधि चयन भएका हुन्। वडा सभापति पदम महताका अनुसार देउवालाई क्षेत्रीय प्रतिनिधिमा सर्वसम्मत चयन गरिएको हो।
देउवा पक्षले १४औँ महाधिवेशनमा कायम गरिएको कांग्रेसको विधानअनुसार १५औँ महाधिवेशन गर्ने तयारी गरिरहेको छ। उक्त विधानमा केन्द्रीय कार्यसमितिका पदाधिकारी तथा सदस्यहरू स्वतः महाधिवेशन प्रतिनिधि हुने व्यवस्था छ।
तर, देउवाले भने यसपटक पनि चुनावी प्रक्रियाबाटै महाधिवेशन प्रतिनिधि बन्ने इच्छा देखाउँदै वडाबाट क्षेत्रीय प्रतिनिधिका लागि उम्मेदवारी दिएका हुन्। यसअघि पनि देउवा वडास्तरबाटै प्रतिस्पर्धा गर्दै महाधिवेशन प्रक्रियामा सहभागी हुँदै आएका छन्।
गन्यापधुरा–१ का नेता रमेश रावलका अनुसार देउवाले क्षेत्रीय प्रतिनिधिको उम्मेदवारी मनोनयनका लागि स्थानीय कौशिलादेवी देउवालाई वारेसनामा दिएका थिए।
त्यस्तै, देउवाका स्वकीय सचिव भानु देउवा पनि गन्यापधुरा–१ को वडा अधिवेशनबाट क्षेत्रीय प्रतिनिधिमा चयन भएका छन्। उनले आफ्नो उम्मेदवारी मनोनयनका लागि स्थानीय इन्द्रबहादुर देउवालाई वारेसनामा दिएका थिए।
प्रकाशित मिति: १६ आश्विन २०८३, शुक्रबार
प्रतिक्रिया