काठमाडौं । हालैको विनाशकारी बाढीपछि नेपालले बाढीको जोखिम घटाउन चार जोखिमपूर्ण हिमतालको पानीको सतह घटाउने योजना अघि बढाएको छ।
सरकारले चालु आर्थिक वर्षमै थुलागी, लोअर वरुण, लुमडिङ त्सो र होङ्गु–२ हिदहिमतालको विस्तृत अध्ययन तथा डिजाइन सुरु गर्ने भएको छ। यी हिमताल ४ हजार ५० मिटरदेखि ५ हजार ४८३ मिटर उचाइमा रहेका छन्।
योजनाअनुसार हिमतालको पानी नहरमार्फत नजिकका नदीमा नियन्त्रित रूपमा बगाइनेछ। पानी निकासका लागि गेटसहितका संरचना निर्माण गरिनेछ। विस्तृत अध्ययनपछि मात्रै पानी निकाल्ने काम सुरु हुने र परियोजना पूरा गर्न ६ वर्षसम्म लाग्न सक्ने अधिकारीहरूले बताएका छन्।
करिब ५ करोड अमेरिकी डलर लागत अनुमान गरिएको परियोजनामा हिमतालमा सेन्सर जडान, बाढी पूर्वानुमान तथा पूर्वसूचना प्रणाली विकास र जोखिममा रहेका समुदायलाई पूर्वतयारी गराउने कार्यक्रमसमेत समावेश छन्।
नेपालले यसअघि त्सो रोल्पा र इम्जा हिमतालको पानीको सतह घटाइसकेको छ। विज्ञहरूका अनुसार तापक्रम वृद्धिसँगै हिमनदी पग्लिने क्रम बढ्दा अस्थिर हिमतालबाट हुने बाढीको जोखिम पनि बढिरहेको छ।
प्रकाशित मिति: १७ आश्विन २०८३, शनिबार
प्रतिक्रिया