काठमाडौं । सर्वोच्च अदालतको न्यायाधीशमा प्रस्तावित जनक पाण्डेले न्यायसम्पादनका क्रममा आफू राजनीतिक विचार र आस्थाबाट पूर्ण रूपमा अलग रहने गरेको बताएका छन् ।
शनिबार संसदीय सुनुवाइ समितिमा आफ्नो न्यायिक निष्पक्षतामाथि उठेका प्रश्नको जवाफ दिँदै उनले न्यायाधीशको इजलासमा पुगेपछि राजनीतिक आग्रहभन्दा प्रमाण र मुद्दाको मिसिललाई प्राथमिकता दिने गरेको स्पष्ट पारेका हुन् ।
नेकपा एमालेकी सांसद पद्मा अर्यालले भुटानी शरणार्थी प्रकरणमा पूर्वगृहमन्त्री बालकृष्ण खाँणको मुद्दामा फरक–फरक राय आउनुको कारणबारे प्रश्न गरेकी थिइन् । जवाफमा पाण्डेले आफूले तत्काल उपलब्ध प्रमाणका आधारमा खाँणलाई थुनामुक्त गर्नुपर्ने राय दिएको भए पनि अन्तिम फैसला आफूले नगरेको बताए ।
उनले उक्त मुद्दामा आफ्नो र अर्का न्यायाधीशको राय फरक परेको तथा तेस्रो न्यायाधीशले खाँणलाई थुनामुक्त गर्ने निर्णय गरेको जानकारी दिए ।
पाण्डेले राजनीतिक विचार हरेक व्यक्तिसँग जोडिएको भए पनि न्यायाधीशको जिम्मेवारी सम्हाल्दा त्यसलाई अदालतबाहिरै छाड्नुपर्ने बताए । उनले भने, ‘हरेक प्राणी एउटा राजनीतिक आइडियोलोजी बोकेर हिँडेको हुन्छ, तर म यता अदालतमा आइसकेपछि मैले त्यो राजनीतिको चप्पल बाहिरै खोलेको छु ।’
राजनीतिक प्रकृतिका मुद्दा अदालतमा आउने भए पनि न्यायाधीशले कुनै दल वा विचारप्रति आग्रह नराखी कानुन, प्रमाण र मिसिलका आधारमा निर्णय गर्नुपर्ने उनको भनाइ थियो ।
यसक्रममा उनले हेटौँडामा कार्यरत रहँदा बागमती प्रदेशका मुख्यमन्त्रीसँग सम्बन्धित मुद्दामा अन्तरिम आदेश माग गरिएको प्रसङ्ग पनि सुनाए । मुख्यमन्त्रीले शपथ लिइसकेको र विश्वासको मतसमेत प्राप्त गरिसकेको अवस्थामा अन्तरिम आदेश जारी गर्न नमिल्ने निष्कर्षमा आफू पुगेको उनले बताए ।
इजलासमा बसेपछि राजनीतिक विषयभन्दा मुद्दामा उपलब्ध प्रमाण र मिसिल नै निर्णयको आधार बन्ने उल्लेख गर्दै पाण्डेले आफूले राजनीतिक प्रभावमा परेर कुनै फैसला नगरेको दाबी गरे ।
प्रकाशित मिति: २१ कार्तिक २०८३, शनिबार
प्रतिक्रिया