काठमाडौं । ६ जना युवा मिलेर मोरङमा १५ वर्षीया एक बालिकामाथि सामुहिक बलात्कार गरेका छन्। ६ जनाले सामुहिक बलात्कार गरेको भन्दै प्रहरीमा उजुरी परेपछि २ जना पक्राउ परेका छन्।
चार जना भने अहिलेसम्म फरार छन्। सामुहिक बलात्कारको आरोपमा विराटनगर महानगरपालिका–३ जहदा बस्ने २० वर्षीय दिपेन्द्रकुमार मण्डल समेत २ जनालाई बिहीबार साँझ प्रहरीले पक्राउ गरेको छ।
मण्डल लगायत ६ जनाले ती किशोरीलाई जहदा जयरामपुर धान खेतमा बोलाई जबरजस्ती करणी गरेको भन्ने उजुरीको आधारमा प्रहरी चौकी मझारेबाट खटिएको प्रहरीले उनीहरूलाई पक्राउ गरेको हो।
घटनामा संलग्न हाल फरार अन्य व्यक्तिहरूको खोजी भइरहेको प्रहरीले जनाएको छ।
त्यसैगरी बर्दियामा १२ वर्षीया बालिकालाई जबरजस्ती करणी गरेको अभियोगमा बढैयाताल गाउँपालिका-९ श्रीलंका टोल बस्ने गेरूवा गाउँपालिक-५ गोला घर भएका ५२ वर्षीय कृष्ण कुमार दमाईलाई बिहीबार दिउँसो प्रहरीले पक्राउ गरेको छ।
दमाईले ती बालिकालाई विभिन्न समयमा पटक-पटक जबरजस्ती करणी गरेको भन्ने उजुरीको आधारमा इलाका प्रहरी कार्यालय मैनापोखर र प्रहरी चौकी सितलाबजारबाट खटिएको प्रहरीले उनलाई पक्राउ गरेको हो।
प्रकाशित मिति: १२ आश्विन २०८०, शुक्रबार
प्रतिक्रिया