काठमाडौं । लेवनानमाथि २–१ को रोमाञ्चक जित निकाल्दै नेपाल वेष्ट एसियन फुटबल महासंघ (वाफ) महिला च्याम्पियनसिपको फाइनलमा प्रवेश गरेको छ ।
मंगलबार राति दोस्रो सेमिफाइनलको दोस्रो हाफमा पुनरागमन जित निकाल्दै नेपालले उपाधिको लािग जोर्डनसँगको भेट तय गरेको हो । पहिलो सेमिफाइनलमा प्यालेस्टाइनलाई ५–० ले हराउँदै जोर्डन फाइनलमा पुगिसकेको छ ।
नेपालको पुनरागमन जितमा सावित्रा भण्डारी र प्रीति राईले गोल गरेका थिए । साउदी अरेबियाको रियादमा इन्जुरी समयमा गोल गर्दै प्रीति राईले नेपालको जित सुनिश्चित गरेकी हुन् । रिबाउन्ड बलमा उनले बक्स बाहिरबाट हानेको प्रहार सिधै जाली चुमेको थियो ।
खेलको ७५औं मिनेटमा नेपाल खेलमा फर्किएको हो । लेवनानको रक्षकले गरेको गल्ती फाइदा उठाउँदै सावित्राले बराबरी गोल गरेकी हुन् ।
यसअघि खेलको ३८औं मिनेटमा नेपालकी रक्षक पुजा रानाले आत्माघाति गोल गरेपछि नेपाल खेलमा पछि परेको थियो । रक्षक पुजा रानाले गोलकिपर एञ्जिला तुम्बाप्पो सुब्बा अगाडी बढेको अवस्थामा दिएको ब्याकपास जाली चुमेको थियो ।
प्रकाशित मिति: १६ फाल्गुन २०८०, बुधबार
प्रतिक्रिया