पोखरा । सहकारी रकम अपचलन मुद्दामा जिल्ला प्रहरी कार्यालय कास्कीको हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले जनताको पक्षमा बोल्दा दुःख भोगेको बताएका छन्।
रास्वपा केन्द्रीय सदस्य ज्वाला सङ्ग्रौलासँगको भेटमा रविले भने, “जनताको हितमा बोल्नेहरूले सधैं दुःख भोगिरहेका छन्। तर, मलाई विश्वास छ कि अदालतले न्याय प्रदान गर्नेछ। सहकारी ठगी प्रकरणमा मेरो कुनै संलग्नता छैन, तपाईंहरू ढुक्क रहनुहोस्।”
रविले आफूलाई वर्तमान अवस्थामा ‘अन्तिम लडाइँ’को रूपमा परिभाषित गर्दै भने, – “स्वतन्त्रता र न्यायको पक्षमा यो हाम्रो अन्तिम लडाइँ हो। बाहिरको अवस्था जस्तो भए पनि सबैले सुरक्षित र शान्तिपूर्ण विरोध गर्न पाउनु पर्छ।”
सङ्ग्रौलाले रविलाई हर्षित अवस्थामा देखेको जानकारी दिँदै भनिन् -, “उहाँको अवस्था चिन्ताजनक जस्तो लागेन; बरु उहाँ हर्षित हुनुहुन्थ्यो र किताबहरू अध्ययन गर्दै हुनुहुन्छ।”
रविलाई सहकारी ठगीसम्बन्धी आरोपमा गत कात्तिक २ गते काठमाडौंबाट पक्राउ गरिएको थियो। त्यसपछिको समयदेखि रास्वपाले प्रदर्शन गर्दै आएको छ भने रविको पक्राउलाई नेताहरूले ‘प्रतिशोध’को रूपमा व्याख्या गर्दै शृङ्खलाबद्ध आन्दोलनको घोषणा गरेका छन्।
प्रकाशित मिति: १० कार्तिक २०८१, शनिबार
प्रतिक्रिया