काठमाडौं । पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेसहित २९ जनाविरुद्ध पर्सा जिल्ला अदालतमा मुद्दा दायर गरिएको छ।
बीरगञ्जस्थित ‘सानो पाइला बचत तथा ऋण सहकारी संस्था’को रकम अपचलन प्रकरणमा उनीहरूमाथि मुद्दा लगाइएको हो।
प्रहरीले घटनाको अनुसन्धान सम्पन्न गरी झण्डै एक महिना अघि सरकारी वकिलको कार्यालय, पर्सालाई प्रतिवेदन बुझाएको थियो। सोही आधारमा शुक्रबार सरकारी वकिल कार्यालयले अभियोग पत्र तयार पारेर जिल्ला अदालतमा पेश गरेको हो।
पर्सा जिल्ला अदालतका सूचना अधिकारी रामनरेश महतोका अनुसार प्रारम्भिक अनुसन्धान, प्रमाण तथा प्रतिवेदनको अध्ययनपछि लामिछानेसहित २९ जनालाई अभियुक्त बनाई अदालतमा मुद्दा दर्ता गरिएको हो।
यस प्रकरणले रास्वपाका सभापति लामिछानेसहित संलग्न भनिएका व्यक्तिहरूलाई थप कानुनी चुनौती सिर्जना गरेको छ। अदालतले अब सो मुद्दामा प्रक्रिया अगाडि बढाउनेछ।
प्रकाशित मिति: १ असार २०८२, आइतबार
प्रतिक्रिया