काठमाडौँ । नेपाली कांग्रेसका प्रवक्ता डा. प्रकाशशरण महतले कुलिङ पिरियड (कार्यकालपछिको विश्राम अवधि) सम्बन्धी विषयमा कांग्रेसको अडान स्पष्ट रहेको बताएका छन्।
बीपी कोइराला स्मृति दिवसको अवसरमा काठमाडौंमा आयोजित कार्यक्रममा बोल्दै महतले कुलिङ पिरियडबारे संसदीय समितिबाट सर्वसम्मत भएको निर्णय कांग्रेसका लागि सम्झौता गर्न नसकिने विषय भएको बताए।
हाल राष्ट्रिय सभामा रहेको विधेयकमा नेकपा एमालेका सांसदहरूले कुलिङ पिरियड हटाउने संशोधन प्रस्ताव राखेका छन्। तर महतले यस्तो प्रयासप्रति आपत्ति जनाउँदै कुलिङ पिरियड कार्यान्वयन हुनैपर्ने धारणा राखे।
भूमिसम्बन्धी विधेयकलगायत संवेदनशील विषयहरूमा कुनै पनि पक्षबाट एकलौटी ढंगले निर्णय गर्न खोजिएको अवस्थामा कांग्रेसले त्यसलाई स्वीकार नगर्ने उनले प्रस्ट पारे। गठबन्धन सरकारले सन्तुलन र सहमतिका आधारमा अघि बढ्नुपर्नेमा महतले जोड दिए।
साथै, महतले सार्वजनिक जीवनमा झूटको राजनीति हावी हुँदै गएको भन्दै सत्य बोल्नेहरूको स्थान ओझेलमा पर्न थालेकोप्रति चिन्ता व्यक्त गरे। “झूट बोल्ने नै सत्यझैं स्थापित हुन थालेको अवस्था गम्भीर छ,” उनले भने।
प्रकाशित मिति: ६ श्रावण २०८२, मंगलबार
प्रतिक्रिया