काठमाडौं । नेपाली कांग्रेसका सांसद रामहरि खतिवडाले संसदीय सुनुवाइ समितिको सभापतिका लागि औपचारिक रूपमा मनोनयन दर्ता गराएका छन्।
पार्टीको सिफारिसअनुसार खतिवडाले उम्मेदवारी दर्ता गरेको कांग्रेस स्रोतले जनाएको छ।
यसअघि खतिवडा प्रतिनिधिसभा अन्तर्गत राज्य व्यवस्था तथा सुशासन समितिका सभापति थिए। तर, निजामति विधेयकमा भएको विवादित छेडखानीपछि समितिको प्रतिवेदन सार्वजनिक भएलगत्तै उनले राजीनामा दिएका थिए।
खतिवडाको राजीनामापछि सुनुवाइ समितिको सभापति ईश्वरी न्यौपानेले पनि पदत्याग गरेर राज्य व्यवस्था तथा सुशासन समितिको सभापति बनेकी थिइन्। त्यसपछि खतिवडालाई सुनुवाइ समितिको सदस्यको जिम्मेवारी दिइएको थियो।
हाल, खतिवडाले पुनः सुनुवाइ समितिको अध्यक्ष पदमा मनोनयन दर्ता गर्दै आफ्नो भूमिका सुदृढ गर्ने तयारी गरेका हुन्।
प्रकाशित मिति: १९ भाद्र २०८२, बिहिबार
प्रतिक्रिया