काठमाडौं । शुक्रबार टुंग्याउने भनिएको राष्ट्रिय स्वतन्त्र पार्टी (रास्वपा) र काठमाडौं महानगरका मेयर बालेन शाहबीचको सहमति शनिबारसम्म पनि अनिश्चित बनेको छ।
बालेन पक्षले सहमतिमा ऊर्जा मन्त्री कुलमान घिसिङलाई पनि सँगै समेट्नुपर्ने अडान लिएपछि अन्तिम चरणमा वार्ता पेचिलो बनेको स्रोतले जनाएको छ। सुरुमा रास्वपा र बालेनबीच दुईपक्षीय सहमति गरेर पछि घिसिङलाई जोड्ने समझदारी भए पनि अन्त्यमा त्रिपक्षीय सहमतिको विषय उठेपछि प्रक्रिया रोकिएको हो।
शुक्रबार दिनभर छलफल भए पनि तय भएको ‘डिनर मिटिङ’समेत हुन सकेन। त्यसपछि बालेन गोदावरी पुगेर आफ्ना निकटसँग परामर्शमा जुटेका थिए। शनिबार बिहान भने बालेन र कुलमानबीच छलफल भइरहेको बताइएको छ।
रास्वपाका नेताहरूका अनुसार बालेन–कुलमानबीचको छलफलपछि मात्रै सहमतिको दिशा स्पष्ट हुनेछ। दुईपक्षीय सहमति भएको खण्डमा बालेनलाई प्रधानमन्त्री र रवि लामिछाने पार्टी नेतृत्वमा रहने तथा पार्टी नाम र चुनाव चिन्ह यथावत् रहने सहमति भइसकेको बताइन्छ। तर तल्लो तहको व्यवस्थापन र त्रिपक्षीय सहमतिले अझै टुंगो पाउन सकेको छैन।
प्रकाशित मिति: १२ पुस २०८२, शनिबार
प्रतिक्रिया