काठमाडौं । देशभर पश्चिमी वायुको आंशिक प्रभावका कारण मौसममा केही परिवर्तन देखिएको छ। जल तथा मौसम पूर्वानुमान महाशाखाका अनुसार आज तराई क्षेत्रका अधिकांश स्थानमा हुस्सु लाग्ने सम्भावना रहेको छ।
कर्णाली र सुदूरपश्चिम प्रदेशसहित अन्य पहाडी तथा हिमाली भू–भागमा मौसम आंशिक बदली रहने अनुमान गरिएको छ। यसैगरी, कोशी, गण्डकी र कर्णाली प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षा तथा हिमपात हुन सक्ने महाशाखाले जनाएको छ।
हुस्सु र कुहिरोका कारण तराई क्षेत्रमा हवाई तथा स्थल यातायात प्रभावित हुन सक्ने भएकाले आवश्यक सतर्कता अपनाउन महाशाखाले आग्रह गरेको छ।
काठमाडौं उपत्यकामा बुधबार बिहान न्यूनतम तापक्रम ५ डिग्री सेल्सीयस मापन गरिएको छ भने आज अधिकतम तापक्रम १७ देखि १८ डिग्री सेल्सीयससम्म पुग्ने पूर्वानुमान गरिएको छ।
प्रकाशित मिति: १६ पुस २०८२, बुधबार
प्रतिक्रिया