स्वीस स्की रिसोर्टमा भएको आगलागीमा मृत्यु हुनेको सङ्ख्या ४१ पुग्यो

एजेन्सी। स्विट्जरल्यान्डको चर्चित क्रान–मोन्टाना स्की रिसोर्टमा नयाँ वर्षको राति भएको भीषण आगलागीमा घाइते एक किशोरको उपचारका क्रममा मृत्यु भएपछि मृतकको संख्या ४१ पुगेको छ। अधिकारीहरूले यो घटनालाई आधुनिक स्विट्जरल्यान्डकै सबैभन्दा घातक आगलागीमध्ये एक भएको बताएका छन्।

वालिस क्यान्टनका सरकारी अभियोजक बेआत्रिस पिलुदका अनुसार १८ वर्षीय स्विस नागरिकको जनवरी ३१ मा जुरिखस्थित अस्पतालमा उपचारका क्रममा निधन भएको हो। उक्त आगलागी सन् २०२६ जनवरी १ को मध्यरातमा ‘ले कन्स्टेलेसन’ नामक बारको भूमिगत भागमा लागेको थियो।

घटनामा ११५ जना घाइते भएका थिए, जसमध्ये धेरैजसो अझै विभिन्न अस्पतालमा उपचाररत छन्। मृत्यु हुनेहरूमा १४ देखि ३९ वर्ष उमेर समूहका व्यक्तिको संख्या बढी रहेको बताइएको छ। मृतकमध्ये २३ जना स्विस नागरिक रहेका छन् भने १८ जना विदेशी नागरिक भएको पुष्टि गरिएको छ।

अनुसन्धानकर्ताहरूका अनुसार शैम्पेन बोतलमा जडान गरिएको स्पार्कलर छतमा प्रयोग गरिएको ध्वनि–रोधक फोमको अत्यन्त नजिक पुगेपछि आगो सल्किएको प्रारम्भिक निष्कर्ष निकालिएको छ। सन् २०१९ यता सो बारमा कुनै पनि औपचारिक अग्निसुरक्षा परीक्षण नगरिएको तथ्य पनि सार्वजनिक भएको छ।

घटनापछि बारका मालिक फ्रान्सेली दम्पती ज्याक र जेसिका मोरेत्तीविरुद्ध लापरबाहीका कारण मृत्यु गराएको आरोपमा आपराधिक अनुसन्धान सुरु गरिएको अधिकारीहरूले जानकारी दिएका छन्।

प्रकाशित मिति: १९ माघ २०८२, सोमबार