जापान। जापानले विश्वकै सबैभन्दा ठूलो आणविक ऊर्जा संयन्त्र आगामी हप्ता पुनः सञ्चालनमा ल्याउने भएको छ। सन् २०११ को फुकुसिमा आणविक दुर्घटनापछि लामो समय बन्द रहेको काशीवाजाकी–कारिवा आणविक संयन्त्र पुनः सुरु गर्ने तयारी गरिएको हो।
टोकियो इलेक्ट्रिक पावर कम्पनी (टेप्को) द्वारा सञ्चालित उक्त संयन्त्रका प्रमुख ताकेयुकी इनागाकीले शुक्रबार आयोजित पत्रकार सम्मेलनमा फेब्रुअरी ९ मा रिएक्टर सञ्चालन सुरु गर्ने योजना रहेको जानकारी दिए।
यसअघि टेप्कोले जनवरी २१ मा रिएक्टर पुनः सञ्चालनमा ल्याएको थियो। तर अनुगमन प्रणालीमा अलार्म बजेपछि भोलिपल्ट नै रिएक्टर बन्द गरिएको थियो। इनागाकीका अनुसार कन्फिगरेसनमा भएको सानो त्रुटिका कारण अलार्म सक्रिय भएको थियो, जसले एउटा केबलमा विद्युतीय प्रवाहमा सामान्य परिवर्तन देखाएको थियो। ती परिवर्तनहरू पूर्ण रूपमा सुरक्षित दायरा भित्र रहेको भन्दै कुनै सुरक्षा जोखिम नरहेको उनले स्पष्ट पारे।
समस्या समाधानपछि अलार्मको सेटिङ परिमार्जन गरिएको र रिएक्टर सञ्चालनका लागि सुरक्षित रहेको निष्कर्ष निकालिएको उनले बताए। अब आगामी चरणमा विस्तृत निरीक्षण गरिने र मार्च १८ वा त्यसपछि व्यावसायिक उत्पादन सुरु गर्ने लक्ष्य राखिएको छ।
काशीवाजाकी–कारिवा संयन्त्र सम्भावित उत्पादन क्षमताका आधारमा विश्वकै सबैभन्दा ठूलो आणविक ऊर्जा केन्द्र मानिन्छ। यद्यपि, यसका सात रिएक्टरमध्ये हाल एक मात्र रिएक्टर पुनः सञ्चालनमा ल्याइँदैछ।
सन् २०११ मा आएको शक्तिशाली भूकम्प र सुनामीका कारण फुकुसिमा दाइची आणविक संयन्त्रका तीन रिएक्टर पग्लिएपछि जापानले अधिकांश आणविक ऊर्जा केन्द्रहरू बन्द गरेको थियो। त्यसयता काशीवाजाकी–कारिवा पनि लामो समयदेखि निष्क्रिय अवस्थामा रहँदै आएको थियो।
ऊर्जा स्रोतमा सीमितता भएको जापानले जीवाश्म इन्धनमाथिको निर्भरता घटाउने, सन् २०५० सम्म कार्बन तटस्थता हासिल गर्ने तथा कृत्रिम बौद्धिकता (एआई) को विस्तारसँगै बढ्दो ऊर्जा माग पूरा गर्ने उद्देश्यले आणविक ऊर्जालाई पुनः सक्रिय बनाउन खोजिरहेको छ।
काशीवाजाकी–कारिवा सन् २०११ पछि टेप्कोद्वारा सञ्चालनमा ल्याइने पहिलो आणविक एकाइ हो। टेप्कोले फुकुसिमा दाइची संयन्त्र पनि सञ्चालन गरेको थियो, जुन हाल चरणबद्ध रूपमा बन्द गर्ने प्रक्रियामा छ।
यद्यपि, संयन्त्र वरपरका क्षेत्रहरूमा जनमत विभाजित देखिएको छ। निगाता प्रान्तले सेप्टेम्बरमा गरेको सर्वेक्षणअनुसार करिब ६० प्रतिशत स्थानीय बासिन्दाले पुनः सञ्चालनको विरोध गरेका छन् भने ३७ प्रतिशतले समर्थन जनाएका छन्।
यसैबीच, जनवरीमा पुनः सञ्चालनको विरोध गर्ने सात समूहले करिब ४० हजार हस्ताक्षरसहित टेप्को र जापानको आणविक नियमन प्राधिकरणसमक्ष निवेदन पेस गरेका थिए। उनीहरूले संयन्त्र सक्रिय भूकम्पीय फल्ट जोनमा अवस्थित रहेको र सन् २००७ मा आएको शक्तिशाली भूकम्पको प्रभाव परेको क्षेत्र भएको भन्दै सुरक्षा चिन्ता व्यक्त गरेका छन्।
प्रकाशित मिति: २३ माघ २०८२, शुक्रबार
प्रतिक्रिया