काठमाडौं। कानुन, न्याय तथा संसदीय मामिला मन्त्री सोविता गौतमले पदबहाली गरेकी छन् ।
शुक्रबार शपथ ग्रहण गरेपछि उनले मन्त्रालय पुगेर औपचारिक रूपमा पदभार ग्रहण गरेकी हुन् । पदबहालीपछि सञ्चारकर्मीहरूसँग कुरा गर्दै मन्त्री गौतमले कानुन सुधारलाई तीव्रता दिने बताइन् ।
उनले भनिन्, “हाम्रो मन्त्रालयबाट सुधार गर्नुपर्ने कानुनहरूलाई तीव्र गतिमा सुधारको बाटोमा लैजाने छौं । कानुन निर्माणमा मेरो मन्त्रालय छिटोभन्दा छिटो काम गर्न तत्पर छ ।”
मन्त्री गौतमले अहिले छलफलको चरणमा रहेको बताउँदै खाका तयार भएपछि मात्रै सुधारका काम अघि बढ्ने स्पष्ट पारिन् । उनले कानुन क्षेत्रमा देखिएका समस्या समाधान गर्न मन्त्रालयले छिटो काम गर्ने प्रतिबद्धता व्यक्त गरिन् ।
नवनियुक्त कानुनमन्त्री सोविता गौतम रास्वपाको समानुपातिक सांसद हुन् ।
प्रकाशित मिति: १३ चैत्र २०८२, शुक्रबार
प्रतिक्रिया