काठमाडौँ । नेकपा एमालेका संसदीय दलका नेता तथा कार्यवाहक अध्यक्ष रामबहादुर थापाले बिहीबार संसदमा गरेको सम्बोधनप्रति नेता सुरेन्द्र पाण्डेले असन्तुष्टि व्यक्त गरेका छन् ।
सामाजिक सञ्जालमार्फत प्रतिक्रिया दिँदै पाण्डेले संसदमा “षड्यन्त्र”का लामा कथाहरू सुनाइएको भन्दै त्यसप्रति आपत्ति जनाएका छन् । उनले सेना, कर्मचारी र प्रविधिलाई दोषारोपण गर्ने प्रवृत्तिको आलोचना गर्दै यस्तो वातावरण सिर्जना हुनुमा सरकारकै अकर्मण्यता जिम्मेवार रहेको प्रश्न उठाएका छन् ।
उनले ‘घेराबन्दी’को नाममा राष्ट्रवादी राजनीति गर्ने पुरानो शैली अब उपयुक्त नभएको उल्लेख गर्दै वास्तविक राष्ट्रवाद भनेको नेपालको आर्थिक सुधारमा केन्द्रित हुनुपर्ने बताएका छन् । अन्य एजेन्डाहरूलाई उनले व्यक्तिगत स्वार्थसँग जोडिएका विषयका रूपमा चित्रण गरेका छन् ।
पाण्डेले आफ्नो कमजोरी लुकाएर कार्यकर्तालाई भ्रममा पार्ने र अतिवादतर्फ धकेल्ने काम नगर्न आग्रह गरेका छन् । साथै, विभिन्न विषयमा छानबिन आवश्यक भए पनि राजनीतिको दिशा जनताको अपेक्षाअनुसार नभएको यथार्थलाई नजरअन्दाज गर्न नहुने उनले बताएका छन् ।
थापाको सम्बोधन विवादमा आएपछि यस विषयमा छलफल गर्न आज नेकपा एमालेको सचिवालय बैठक बस्ने तयारी गरिएको छ ।
प्रकाशित मिति: २० चैत्र २०८२, शुक्रबार
प्रतिक्रिया