ढाका । भारतले आफ्नो संसद् भवनमा राखेको विवादास्पद नक्सालाई लिएर बंगलादेशको सरकारले भारतीय विदेश मन्त्रालयसँग प्रष्टीकरण माग्ने भएको छ । यसका लागि सरकारले आफ्नो भारतीय मिसनलाई निर्देशन दिएको हो ।
बंगलादेशका विदेश राज्यमन्त्री सहरियार आलमले ढाकामा पत्रकारसँग कुरा गर्दै अवामी लिगको सरकार नेपाल र पाकिस्तानमा समेत विरोध भइरहेको नक्शाबारे प्रष्टीकरण माग्ने प्रक्रियामा रहेको बताए । बंगलादेशको विपक्षी बंगलादेश नेसनालिस्ट पार्टीले भारतीय नक्सा आफ्नो देशको सार्वभौमिकता र स्वतन्त्रताका लागि चुनौतीका हुन सक्ने भन्दै विरोध जनाएको थियो ।
‘यो नक्सालाई लिएर व्यापकरुपमा आक्रोश छ । यो राखिएको कुरामा कुनै सन्देह छैन । यद्यपि, थप प्रष्टीकरणका लागि हामीले दिल्लीस्थित मिसनलाई भारतीय विदेश मन्त्रालयसँग कुराकानी गर्न आग्रह गरेका छौँ । उनीहरूको प्रष्टीकरण आएपछि थप निर्णय लिइनेछ,’ ढाका ट्रिवुनले आलमलाई उद्धृत गर्दै लेखेको छ ।
गत २८ मेमा भारतीले प्रधानमन्त्री नरेन्द्र मोदीले नयाँ संसद् भवनको उद्घाटन गरेका थिएँ, जहाँ राखिएको मुरल नक्साले नेपालमा पनि विरोध उत्पन्न गरिरहेको छ । प्रधानमन्त्री पुष्पकमल दाहाल प्रचण्डले आफ्नो भारत भ्रमणमा यो विषयमा गम्भीरतापूर्वक कुरा नउठाएको भनेर संसदमा समेत आलोचना भएको थियो ।
प्रकाशित मिति: २४ जेष्ठ २०८०, बुधबार
प्रतिक्रिया