सुकुम्बासी बस्तीमा खुशीयाली : ‘फ्रिजी लाईट’ संस्थाद्वारा न्यानो कपडा तथा खाद्य सहायता

काठमाडौं । अष्ट्रिया देशका संगीतकर्मी फ्रिजी ग्रिफ (Frizzey Greif) द्वारा संचालित संस्था ‘फ्रिजी लाइट एशोसियसन’ (Frizzey Light Association)ले हालै काठमाडौंमा वृहत “कपडा तथा खाद्य सहायता” कार्यक्रम सम्पन्न गरेको छ ।

सो सहायताको क्रममा संस्थाले काठमाडौंका विभिन्न सुकुम्बासी बस्ती तथा सडक पेटीमा बसोबास गर्ने ४१५ जना मानिसहरूलाई न्यानो टोपी तथा कपडाहरू वितरण गरेको छ । यसका साथै सो संस्थाले कपडा पाउने सबैलाई खाजा समेत वितरण गरेको थियो।

कपडा वितरण गरिएका मानिसहरूबाट अति विपन्नहरू छानेर ५० परिवारलाई चामल, दाल, तेल, चना, सोयाविन, नुन र साबुन जस्ता सामग्रीहरू पनि संस्थाले वितरण गरेको छ ।

आफूहरूलाई दुःख परेको बेलामा यसरी कपडा र खाद्यान्न सहायता पाउँदा आफूहरूलाई बल्ल चाडबाड सुरु भएको जस्तो लागेको सहायता लाभान्वितहरु बताउँछन् ।

फ्रिजी ग्रिफले आफ्नो संस्था मार्फत २०७२ सालको भूकम्प पश्चात नेपालका सबै जसो जिल्लामा पुगेर दशौं हजार परिवारलाई राहत वितरण गर्ने, दुर्गम गाउँका विद्यालय भवन निर्माण गर्ने जस्ता धेरै परोपकारी कामहरू पनि गर्दै आएका छन् ।

प्रकाशित मिति: २२ कार्तिक २०८०, बुधबार