राष्ट्रपति विद्यादेवी भण्डारीले इस्लाम धर्मावलम्बीहरूको महान पर्व ईदको सुभकामना दिएकी छिन् ।
आज जारी गरेको शुभकामना सन्देशमा स्वदेश तथा विदेशमा रहेका सम्पूर्ण नेपाली इस्लाम धर्मावलम्बी दिदीबहिनी तथा दाजुभाइ हरुमा सुख, शान्ति र समृद्धिको कामना गरेकी हुन् ।
ईदले इस्लाम समुदायको मौलिक संस्कृति र परम्पराको संरक्षण र संवर्द्धन गर्न टेवा पुग्ने भन्दै उनले ‘विविधतायुक्त नेपाली समाजमा विद्यमान सहिष्णुता र सहकार्यको संस्कृतिलाई पनि थप सुदृढ बनाउन मद्दत पुर्याएको छ’, उनले भनिन् , ‘इस्लाम समुदायमा रहेको दान गर्ने परम्पराका साथै ईदको अवसरमा मान्यजनबाट आशिर्वाद लिने एवं आपसमा खुसी आदानप्रदान गर्ने प्रचलनले नेपाली संस्कृतिमा अन्तर्निहित प्रबल मानवीय पक्षलाई प्रतिविम्वित गर्दछ।’
मुलुकमा रहेका अनेकौँ जातजाति, भाषा, धर्म र संस्कृतिलाई एकताको एउटै मालामा गाँसेर संविधानले सबैलाई समान अवसर प्रदान गरेको भन्दै , संविधानको यस पवित्र भावनालाई आत्मसात् गरी नेपाली राष्ट्रियता र राष्ट्रिय एकताको प्रवर्द्धन गर्नु हामी सबैको साझा कर्तव्य हो भनेकी छिन् ।
सन्देशमा विविधता नै नेपाली समाजको पहिचान र सामर्थ्य को रूपमा रहिआएको पनि उल्लेख गरेकी छिन् ।
प्रकाशित मिति: २० बैशाख २०७९, मंगलबार
प्रतिक्रिया