रामेछापमा पहिरो, २ को मृत्यु, ८ बेपत्ता

काठमाडौँ । रामेछापको दोरम्बा शैलुङ गाउँपालिका वडा नम्बर–३ स्थित लेखर्कमा पहरोले पुरिँदा २ जनाको मृत्यु भएको छ । ८ जना बेपत्ता छन् ।

जिल्ला प्रहरी कार्यालय रामेछापका सूचना अधिकारी कौशल न्यौपानेका अनुसार गएराति परेको भीषण वर्षाका कारण गाउँ नजिकै रहेको खोलाको कटानले पहिरो खसेको थियो । घटनास्थलमा प्रहरी टोली पुग्दा कम्तीमा ३ घर बगाएको र २ जनाको शव घटनास्थलमा निकालिएको उनले बताए ।

उनका अनुसार आज बिहान ३:३५ बजे पहिरोले गाउँमा क्षति पुर्‍याएको सूचना जिल्ला प्रहरी कार्यालयमा प्राप्त भएको थियो । त्यसअघि नै टोकरपुर र दोरम्बाबाट प्रहरीको टोली घटनास्थल प्रस्थान गरेको थियो ।

तर बाटोमा पर्ने अँधेरी खोलाको पुल पनि भत्किएकाले प्रहरीहरू घटनास्थल पुग्न ढिलो भएको थियो ।

प्रकाशित मिति: ९ भाद्र २०८१, आइतबार