काठमाडौं । इक्वेडरले कतारमा आज (आइतबार) बाट सुरु भएको विश्वकप फुटबलको उद्घाटन खेलमा विजयी सुरुआत गरेको छ ।
इक्वेडरले आयोजक राष्ट्र कतारलाई २–० गोलले पराजित गर्दै विश्वकपमा विजयी सुरुआत गरेको हो । इक्वेडरको जितमा दुवै गोल कप्तान कप्तान एनर भ्यालेन्सियाले गरे ।
खेलको तेस्रो मिनेटमा नै इक्वेडरले गोल गरेको थियो । तर भिडियो एसिस्टेन्ट रेफ्री (भार) ले त्यो गोललाई अफसाइड दिएपछि गोलको मान्यता पाएन । योसँगै इक्वेडरले कतारविरुद्ध अग्रता बनाउन सकेन ।
खेलको १५औँ मिनेटमा इक्वेडरले पेनाल्टी पायो । भ्यालेन्सियालाई कतारका गोलकिपर साद अलसिबले डिबक्सभित्र लडाएपछि इक्वेडरले पेनाल्टी पाएको थियो । भ्यालेन्सियाले पेनाल्टीबाट गोल गर्दै इक्वेडरलाई १–० को अग्रता दिलाए ।
खेलको ३१औँ मिनेटमा इक्वेडरले दोस्रो गोल थप्न सफल भयो । यो गोल पनि भ्यालेन्सियाले नै गर्दै कतारविरुद्ध इक्वेडरलाई २–० को अग्रता दिलाए । पहिलो हाफमा २–० गोलको अग्रता बनाएको इक्वेडरले दोस्रो हाफमा कतारलाई रोक्दै जित निकालेको हो । यो जितसँगै इक्वेडरले महत्वपूर्ण तीन अंक बटुलेको छ ।
समूह ‘ए’ मा आयोजक कतारसँगै इक्वेडर, नेदरल्यान्ड्स र सेनेगल रहेका छन् ।
प्रकाशित मिति: ४ मंसिर २०७९, आइतबार
प्रतिक्रिया