काठमाडौं । विघटित प्रतिनिधि सभाका १६ जना पदाधिकारीहरूले सुविधा स्वरूप प्रयोग गर्दै आएका सवारी साधनहरू फिर्ता गरेका छन् ।
संसद् सचिवालयको सवारी शाखा प्रमुख प्रदीप नेपालका अनुसार १२ वटा विषयगत समितिका सभापति र चार जना प्रमुख सचेतक तथा सचेतकले आफूहरूलाई तोकिएका गाडीहरू सचिवालयमा बुझाएका हुन् ।
प्रतिनिधि सभामा १० वटा विषयगत समिति र प्रतिनिधि सभा सदस्यकै संयोजनमा गठन भएका दुई संयुक्त समितिहरू थिए । ती सबै समितिका सभापतिहरूले पनि आफ्नो सवारी सुविधा फिर्ता गरेका छन् ।
त्यस्तै, नेकपा (एमाले) र नेकपा (माओवादी केन्द्र) का प्रमुख सचेतक र सचेतकले समेत प्रयोगमा रहेका गाडी बुझाएका छन् । यद्यपि, नेपाली कांग्रेसका प्रमुख सचेतक र सचेतकको गाडी भने जलेको अवस्थामा रहेको छ ।
गत भदौ २४ गते सिंहदरबारस्थित संसद सचिवालय परिसरमा लागेको आगलागीमा कांग्रेस र एमाले दुवैको संसदीय दल कार्यालय जलेको थियो । सोही घटनामा कांग्रेसका प्रमुख सचेतक र सचेतकको गाडी पनि आगलागीबाट नष्ट भएको सचिवालयले जनाएको छ ।
सरकारले हाल मितव्ययिता नीति अपनाउँदै पूर्वपदाधिकारीहरूले प्रयोग गरिरहेका सरकारी सवारी साधन फिर्ता गराउने निर्णय गरेपछि संसद् सचिवालयले पनि त्यसअनुसार कार्य अघि बढाएको हो । सचिवालयका अनुसार अब पूर्वसभामुख र राष्ट्रिय सभाका पूर्वअध्यक्षहरूले प्रयोग गरिरहेका गाडी फिर्ता गराउन पनि तयारी भइरहेको छ ।
प्रकाशित मिति: ११ आश्विन २०८२, शनिबार
प्रतिक्रिया