काठमाडौं । रूपन्देहीका दुई प्रतिनिधिसभा उम्मेदवारले आफ्नो चुनावी खर्च विवरण निर्वाचन आयोगमा बुझाएका छन्। उनीहरूले आयोगले तोकेको सीमाभित्र रहेर खर्च गरेको बताएका छन्।
चुन्नप्रसाद पौडेलको खर्च विवरण
रूपन्देही क्षेत्र नं. २ का उम्मेदवार चुन्नप्रसाद पौडेलले २४ लाख ४३ हजार ८२३ रुपैयाँ खर्च भएको जानकारी दिएका छन्।
उनका अनुसार सबैभन्दा धेरै खर्च मसलन्द, छपाइ र प्रिन्टिङमा भएको छ। यस शीर्षकमा ९ लाख २१ हजार ७४० रुपैयाँ खर्च गरिएको छ।
त्यसपछि खाना, नास्ता तथा चियापानमा ५ लाख ४५ हजार ६८९ रुपैयाँ खर्च भएको छ। साथै बिजुली तथा साउन्ड सिस्टममा २ लाख ७४ हजार ७२० रुपैयाँ खर्च गरिएको छ।
यसैगरी अफिस सञ्चालन, प्रचारप्रसार र कार्यालय भाडामा २ लाख ४० हजार रुपैयाँ खर्च भएको छ। त्यस्तै सवारी साधन तथा इन्धनमा १ लाख ७९ हजार ८९४ रुपैयाँ खर्च गरिएको छ।
यस्तै गाडी भाडामा १ लाख ५० हजार रुपैयाँ खर्च भएको छ। साथै मञ्च व्यवस्थापन, कुर्सी र टेन्टमा १ लाख ३१ हजार ७८० रुपैयाँ खर्च भएको विवरणमा उल्लेख छ।
वासुदेव घिमिरेको खर्च विवरण
उता रूपन्देही क्षेत्र नं. ३ का उम्मेदवार वासुदेव घिमिरेले करिब १९ लाख ४६ हजार ३ सय रुपैयाँ खर्च भएको बताएका छन्।
उनका अनुसार सवारी साधनमा सबैभन्दा बढी खर्च भएको छ। यसमा ५ लाख ७९ हजार २०० रुपैयाँ खर्च गरिएको छ।
त्यसपछि खाना, खाजा तथा आवासमा ४ लाख ४६ हजार रुपैयाँ खर्च भएको छ। त्यस्तै प्रचारप्रसार सामग्रीमा २ लाख ३६ हजार रुपैयाँ खर्च गरिएको छ।
साथै निर्वाचन प्रतिबद्धता पत्र छपाइमा २ लाख २७ हजार रुपैयाँ खर्च भएको छ। यस्तै घरदैलो कार्यक्रममा १ लाख ८० हजार रुपैयाँ खर्च गरिएको छ।
यसका साथै झन्डा तथा ब्यानरमा ६६ हजार रुपैयाँ खर्च भएको छ। नमुना मतपत्र छपाइमा ५७ हजार ५ सय रुपैयाँ खर्च गरिएको छ।
त्यस्तै क्षेत्रीय निर्वाचन कार्यालय सञ्चालनमा ४४ हजार ६ सय रुपैयाँ खर्च भएको छ। मनोनयन दर्तामा १० हजार रुपैयाँ खर्च गरिएको छ।
निर्वाचन आयोगको खर्च सीमा
यसैबीच निर्वाचन आयोगले उम्मेदवारका लागि खर्च सीमा तोकेको छ। भौगोलिक अवस्था र पहुँचका आधारमा २५ लाखदेखि ३३ लाख रुपैयाँसम्म खर्च गर्न पाइन्छ।
त्यसअनुसार रूपन्देहीका पाँचवटै निर्वाचन क्षेत्रमा अधिकतम २९ लाख रुपैयाँसम्म खर्च गर्न पाइने व्यवस्था गरिएको थियो।
प्रकाशित मिति: २६ फाल्गुन २०८२, मंगलबार
प्रतिक्रिया