हेटौँडा । बागमती प्रदेश सरकारमा सहभागी नेकपा (एमाले) का ६ मन्त्रीले बुधबार सामूहिक रूपमा राजीनामा दिएका छन्। मुख्यमन्त्री इन्द्रबहादुर बानियाँलाई राजीनामा बुझाउने तयारी भए पनि समय नपाएपछि उनीहरूले मुख्यमन्त्री तथा मन्त्रिपरिषद्को कार्यालयको सचिवालयमा राजीनामा दर्ता गराएका हुन्।
एमालेका मन्त्रीहरूले बुधबार दिउँसो मुख्यमन्त्री कार्यालयमा पुगेर सामूहिक राजीनामा बुझाएका हुन्। मुख्यमन्त्री बानियाँ भने चितवनमा आयोजित एक कार्यक्रममा सहभागी रहेको उनको सचिवालयले जनाएको छ।
राजीनामा दिनेमा कृषि, पशुपन्छी, वन तथा वातावरणमन्त्री मधुसुदन पौडेल, भौतिक पूर्वाधार विकासमन्त्री डा. दिनेशचन्द्र देवकोटा, उद्योग, पर्यटन, श्रम तथा यातायात मन्त्रालयअन्तर्गत यातायात हेर्ने मन्त्री जयराम थापा, वन तथा वातावरण हेर्ने मन्त्री भरतबहादुर केसी, स्वास्थ्य तथा सामाजिक विकास मन्त्रालयअन्तर्गत स्वास्थ्य हेर्ने मन्त्री किरण थापा र उद्योग, पर्यटन, श्रम तथा यातायातमन्त्री बिन्दु श्रेष्ठ छन्।
एमाले बागमती प्रदेश संसदीय दलका नेता जगन्नाथ थपलियाले मुख्यमन्त्री बानियाँलाई सम्बोधन गर्दै पठाएको पत्रमा पार्टीको निर्णय तथा वर्तमान राजनीतिक परिस्थितिलाई दृष्टिगत गर्दै सरकारमा सहभागी सबै मन्त्रीले बुधबारकै मितिदेखि लागू हुने गरी सामूहिक राजीनामा दिएको उल्लेख छ।
पत्रमार्फत राजीनामा स्वीकृत गरी आवश्यक संवैधानिक तथा कानुनी प्रक्रिया अघि बढाउनसमेत आग्रह गरिएको छ।
यसअघि नै एमालेले मुख्यमन्त्री बानियाँ नेतृत्वको प्रदेश सरकारलाई दिएको समर्थन फिर्ता लिइसकेको छ। एमाले संसदीय दलका नेता थपलियाले बुधबार सरकारलाई दिएको समर्थन फिर्ता लिएको जानकारी गराएका हुन्।
एमालेले समर्थन फिर्ता लिएपछि मुख्यमन्त्री बानियाँ नेतृत्वको सरकार अल्पमतमा परेको छ। अब प्रदेशमा नयाँ सत्ता समीकरण निर्माण हुने वा मुख्यमन्त्रीले विश्वासको मत लिनुपर्ने अवस्था सिर्जना भएको छ।
बागमती प्रदेशसभामा हाल १०४ सदस्य छन्। सरकार गठनका लागि कम्तीमा ५३ सांसदको समर्थन आवश्यक पर्छ। संविधानअनुसार मुख्यमन्त्री बानियाँले अब ३० दिनभित्र प्रदेशसभाबाट विश्वासको मत लिनुपर्नेछ।
केन्द्रमा नेपाली कांग्रेस र एमालेबीचको सत्ता सहकार्य अन्त्य भएपछि त्यसको प्रत्यक्ष प्रभाव प्रदेश सरकारमा पनि परेको हो।
प्रकाशित मिति: ६ श्रावण २०८३, बुधबार
प्रतिक्रिया