काठमाडौं। रसुवाको भोटेकोशी नदीमा आएको विनाशकारी बाढीमा परी ठूलो मानवीय क्षति भएको छ। नेपाल प्रहरीले शुक्रबार दिउँसोसम्म विभिन्न जिल्ला तथा सीमावर्ती भारतीय क्षेत्रबाट गरी १ हजार २९५ जनाको शव फेला परेको जनाएको छ।
केन्द्रीय प्रहरी प्रवक्ता प्रहरी वरिष्ठ उपरीक्षक अविनारायण काफ्लेका अनुसार फेला परेका शवमध्ये रसुवामा १४०, नुवाकोटमा १८६, धादिङमा ६५, चितवनमा ३५९, गोरखामा ७२, तनहुँमा ३८, नवलपरासी पूर्वमा २२१, नवलपरासी पश्चिममा १९४ तथा भारतबाट प्राप्त १८ वटा रहेका छन्।
बाढीमा परी घाइते भएका दुई जनाको उपचारका क्रममा टिचिङ अस्पताल र राष्ट्रिय ट्रमा सेन्टरमा मृत्यु भएको प्रहरीले जनाएको छ।
फेला परेका शवको पहिचानका लागि प्रहरीले डिएनए नमुना संकलनलाई तीव्रता दिएको छ। हालसम्म मृतकका १ हजार २६० र आफन्तका ८४६ गरी कुल २ हजार १०६ वटा डिएनए नमुना संकलन गरिएको छ।
प्रहरीका अनुसार हालसम्म प्रक्रिया पूरा गरी २२२ महिला, ३५५ पुरुष र पहिचान नखुलेका ४५३ गरी कुल १ हजार ३० शवको व्यवस्थापन गरिएको छ। पहिचान हुन बाँकी १ हजार २६३ शवको विवरण नेपाल प्रहरीको आधिकारिक वेबसाइटमा सार्वजनिक गरिएको छ।
विपद्पछि प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि ७ हजार ९१२ प्रहरी कर्मचारी परिचालन गरिएको छ। बाढीमा परी अझै ४ हजार ८९८ जना बेपत्ता रहेकाले उनीहरूको खोजी कार्य जारी रहेको प्रहरीले जनाएको छ।
यस्तै, प्रभावित जिल्लाका होल्डिङ सेन्टरमा ३ हजार ६५५ जनालाई आश्रय दिइएको छ। प्रहरीले जोखिममा रहेका नागरिकलाई सुरक्षित स्थानमा स्थानान्तरण गर्ने, स्थानीय तह तथा सम्बन्धित निकायसँग समन्वय गरी उद्धार गर्ने र बाढीका कारण अवरुद्ध सडक खुलाउने कार्यलाई प्राथमिकताका साथ अघि बढाइरहेको जनाएको छ।
प्रकाशित मिति: १९ भाद्र २०८३, शुक्रबार
प्रतिक्रिया