काठमाडौं । नेपाली चलचित्र ‘३६ को आँकडा’ मा समावेश गीत ‘बहुलाउँछु कि क्या हो’ सार्वजनिक भएको छ। सत्यराज आचार्य र अञ्जु पन्तको स्वर रहेको गीत ओएसआर डिजिटलको आधिकारिक युट्युब च्यानलमार्फत सार्वजनिक गरिएको हो।
सुरेश अधिकारीको शब्द तथा संगीत रहेको गीतमा प्रेम, आकर्षण र भावनात्मक अनुभूतिलाई प्रस्तुत गरिएको छ। फरेन्द्र राईको एरेन्जमेन्ट रहेको गीतमा नेपाली संगीत क्षेत्रका अनुभवी वाद्यवादक तथा प्राविधिकको सहभागिता छ। गीतको मिक्सिङ तथा मास्टरिङ किशोर थापाले गरेका हुन् भने रेकर्डिङ पर्पल रेकर्डिङ स्टुडियोमा गरिएको हो।
गीतसँगै सार्वजनिक सामग्रीले चलचित्रप्रति दर्शकको चासो बढाउने अपेक्षा गरिएको छ। चलचित्रमा रेखा थापा, पूजा शर्मा, निरुता सिंह, महेश त्रिपाठी, पुष्प खड्का, सुवर्ण थापा र रमेश चन्द्र सिदारीलगायत कलाकारको अभिनय रहेको छ। निशा अधिकारी अतिथि भूमिकामा देखिनेछिन्।
शबिर श्रेष्ठको लेखन तथा निर्देशनमा बनेको चलचित्रको कथा पनि श्रेष्ठकै हो। चलचित्रका लेखक शिवम अधिकारी हुन्। चलचित्रमा ईश्वर सिंकेमेनाले छायांकन निर्देशनको जिम्मेवारी सम्हालेका छन् भने सम्पादन बनिश शाह र रामप्रसाद चौधरीले गरेका छन्। नृत्य निर्देशन राजु शाहले गरेका छन्।
रेखा फिल्म्स र काइट्स इन्टरटेनमेन्ट प्रालिको प्रस्तुतिमा बनेको चलचित्रका निर्माता सरस्वती थापा, दुर्गा सापकोटा र गीता श्रेष्ठ हुन्। चलचित्रको पोस्ट प्रोडक्सन काइट्स इन्टरटेनमेन्ट प्रालि तथा किन्डल सिने स्टुडियोमा गरिएको हो।
‘३६ को आँकडा’ आगामी मंसिर १७ गते अर्थात् डिसेम्बर ३ मा सिनेमाघरमा प्रदर्शन हुने जनाइएको छ। चलचित्रको वितरण आरआर फिल्म्सले गर्नेछ भने डिजिटल पार्टनर ओएसआर डिजिटल रहेको छ।
गीत सार्वजनिक भएसँगै चलचित्रको प्रचारप्रसारले गति लिने अपेक्षा गरिएको छ। अनुभवी गायक–गायिकाको स्वर, सुरेश अधिकारीको संगीत र चर्चित कलाकारहरूको अभिनयले ‘३६ को आँकडा’ लाई दर्शकमाझ थप चर्चामा ल्याउने निर्माण पक्षको अपेक्षा छ।
भिडियोः
प्रकाशित मिति: ११ कार्तिक २०८३, मंगलबार
प्रतिक्रिया