स्याङ्जा । नेपाली कांग्रेसका सभापति गगन थापाले आगामी स्थानीय तह निर्वाचनको तयारीमा अहिलेदेखि नै जुट्न नेता तथा कार्यकर्तालाई निर्देशन दिएका छन् । उनले आगामी मंसिरलाई सङ्गठन जागरणको महिनाका रूपमा अघि बढाउन आग्रह गरेका छन् ।
स्याङ्जामा आयोजित कार्यकर्ता भेटघाटमा थापाले निर्वाचनमा मतभन्दा पनि जनताको विश्वास पुनःस्थापित गर्नु प्राथमिकता भएको बताए । पार्टीको छवि सुधार्न र जनतासँगको सम्बन्ध बलियो बनाउन प्रत्येक सदस्यले मेहनत गर्नुपर्ने उनको भनाइ थियो ।
थापाका अनुसार पार्टीले आगामी पुस र माघभित्र उम्मेदवारको प्रारम्भिक छनोट गर्नेछ । यसका लागि तल्लो तहबाट डिजिटल प्रणालीमार्फत प्राप्त हुने प्रारम्भिक सूचीका आधारमा उम्मेदवार तय गरिनेछ ।
निर्वाचनको मुखमा मात्रै टिकट खोज्ने प्रवृत्ति अन्त्य गर्दै पार्टी विधानअनुसार उम्मेदवार छनोट प्रक्रिया अघि बढाइने उनले स्पष्ट पारे । कात्तिक १२ गतेको शपथ ग्रहणपछि बस्ने केन्द्रीय समितिको बैठकले पार्टीका आगामी योजनाबारे ठोस निर्णय गर्ने उनले बताए ।
प्रकाशित मिति: १० कार्तिक २०८३, सोमबार
प्रतिक्रिया