आरुखर्क माध्यमिक विद्यालयको ५० औं स्वर्ण जयन्ती पौष ७ मा

नुवाकोट । नुवाकोटको श्री आरुखर्क माध्यमिक विद्यालयले आफ्नो ५० औं जन्म जयन्ती (स्वर्ण जयन्ती) पुस ७ गते मनाउने भएको छ ।

विद्यालयले आज पत्रकार सम्मेलन गरि विभिन्न कार्यक्रमहरू आयाेजना गरि स्वर्ण महोत्सव पुस ७ मा गर्ने जानकारी गराएको हो । विद्यालयले गत मङ्सिर ३० गतेदेखि विविध सांस्कृतिक, खेलकुद र शैक्षिक गतिविधिहरूसहित विशेष कार्यक्रमहरू गरेको छ ।

यस समारोहको सफलताका लागि ६१ सदस्यीय विद्यालय स्वर्ण जयन्ती मूल समारोह आयोजक समिति गठन गरिएको छ। जसको अध्यक्षता विद्यालय व्यवस्थापन समितिका अध्यक्ष नवराज खतिवडाले गरेका छन्। विद्यालयले उक्त अवसरमा आर्थिक सङ्कलन उपसमिति पनि गठन गरेको छ। जसको संयोजकत्व विकास खतिवडाले गरेका छन्। उक्त समितिले हालसम्म रु ३५,४७,७१५ (पैत्तिस लाख सच्चालिस हजार सात सय पन्ध्र) सङ्कलन गरेको जानकारी पनि दिइएको छ।

आर्थिक सङ्कलनका लागि अभिभावक, समाजसेवी, शिक्षाविद्, बुद्धिजीवी, जनप्रतिनिधि र विद्यालयका पूर्व विद्यार्थीहरूबाट स्वैच्छिक चन्दा संकलन भइरहेको विद्यालयले जनाएको छ। नुवाकोट जिल्ला क्षेत्र नम्बर-२ का सङ्घीय सांसद अर्जुन नरसिंह केसीको प्रमुख आतिथ्यतामा र बागमती प्रदेशका सांसद राम प्रसाद ढुङ्गानाको विशेष आतिथ्यतामा स्वर्ण महोत्सव उद्घाटन हुनेछ ।

समारोहमा विद्यार्थीहरूको सांस्कृतिक कार्यक्रम, झाँकी प्रदर्शन, खेलकुद गतिविधिहरू र विभिन्न अतिरिक्त क्रियाकलापमा उत्कृष्ट स्थान हासिल गर्ने विद्यार्थीहरूलाई ट्रफी, पदक र प्रमाणपत्र वितरण गरिने विद्यालयले जनाएकाे छ । साथै, स्वर्ण महोत्सवको सफलताका लागि आर्थिक र भौतिक सहयोग पुर्याउने दाता, जग्गा दाता, पूर्व शिक्षक, विद्यालय व्यवस्थापन समितिका पूर्व पदाधिकारीहरूलाई सम्मान गरिने कार्यक्रम पनि समावेश गरिएको विद्यालयले जनाएको छ।

विद्यालयको प्रधानाध्यापक सुदर्शन खतिवडाले विद्यालयको समृद्ध इतिहास र यस अवसरमा आयोजित कार्यक्रमको महत्वलाई उल्लेख गर्दै सम्पूर्ण समुदायलाई कार्यक्रममा सहभागी हुन प्रोत्साहित गरेका छन्।

‘श्री आरुखर्क माध्यमिक विद्यालय’ वि.सं २०३१ सालको पौष ७ गते औपचारिक रूपमा स्थापना भएको थियो र यस विद्यालयले ५० वर्षको यात्रामा शिक्षा र समुदायका क्षेत्रमा महत्वपूर्ण योगदान पुर्याएको छ।

प्रकाशित मिति: २ पुस २०८१, मंगलबार