एजेन्सी । इरानमा सरकारविरुद्ध जारी रक्तपातपूर्ण प्रदर्शनका क्रममा ज्यान गुमाउनेको संख्या कम्तीमा ६४६ पुगेको छ। देशभर आन्दोलन चर्किँदै गएपछि इरानी सरकारले आफ्ना नागरिकमाथि लगाएको कडा सञ्चार प्रतिबन्धलाई मङ्गलबार आंशिक रूपमा खुकुलो पारेको छ।
सरकारले मोबाइल फोनमार्फत विदेशमा फोन गर्न अनुमति दिएको भए पनि इन्टरनेटमा लगाइएको प्रतिबन्ध भने यथावत् छ। त्यसैगरी, एसएमएस सेवा अझै सञ्चालनमा ल्याइएको छैन। अन्तर्राष्ट्रिय सञ्चारमाध्यमहरूका अनुसार इरानभित्रबाट विदेशमा फोन गर्न सकिए पनि विदेशबाट इरानभित्र कल गर्न भने अझै सम्भव छैन। राजधानी तेहरानका बासिन्दाहरूले इन्टरनेट पहुँच बाहिरी संसारसँग पूर्ण रूपमा अवरुद्ध रहेको र सरकारद्वारा अनुमोदित सीमित स्थानीय वेबसाइटहरूमा मात्र पहुँच उपलब्ध रहेको बताएका छन्।
मानव अधिकारकर्मीहरूका अनुसार मृत्यु हुने ६४६ जनामध्ये ५१२ जना प्रदर्शनकारी र १३४ जना सुरक्षाकर्मी रहेका छन्। पछिल्ला दुई हप्तामा मात्रै १० हजार ७०० भन्दा बढी प्रदर्शनकारीलाई हिरासतमा लिइएको जनाइएको छ।
इरानको बिग्रँदो अवस्थालाई ध्यानमा राख्दै फ्रान्सले तेहरानस्थित आफ्नो दूतावासका अनावश्यक कर्मचारीहरूलाई फिर्ता बोलाएको छ। आइतबार र सोमबार ती कर्मचारीहरूले इरान छाडेका छन् भने फ्रान्सेली राजदूत भने तेहरानमै रहेका छन्। यस्तै, जर्मन चान्सलर फ्रेडरिक मेर्जले इरानी सरकारलाई प्रदर्शनकारीमाथि भइरहेको हिंसा तत्काल अन्त्य गर्न आग्रह गरेका छन्। उनले वर्तमान शासन अन्तिम चरणमा पुगेको दाबी गर्दै बल प्रयोग गरेर सत्ता टिकाउने प्रयास अन्ततः असफल हुने चेतावनी दिएका छन्।
यसैबीच, इजरायली सेनाले इरानको अवस्थालाई नजिकबाट नियालिरहेको र कुनै पनि अप्रत्याशित परिस्थितिका लागि सतर्क रहेको जनाएको छ। गत वर्ष इजरायलले इरानको आणविक कार्यक्रममाथि आक्रमण गरेपछि दुई देशबीच भएको संघर्षमा ठूलो मानवीय क्षति भएको थियो। पछिल्लो साता इरानले इजरायल वा अमेरिकाबाट कुनै पनि आक्रमण भए कडा जवाफी कारबाही गर्ने चेतावनीसमेत दिएको छ।
बिहीबारदेखि बन्द गरिएको इन्टरनेट र सञ्चार सेवा पूर्ण रूपमा कहिले खुल्ने हो भन्नेबारे भने अझै अन्योल कायमै रहेको छ।
प्रकाशित मिति: २९ पुस २०८२, मंगलबार
प्रतिक्रिया