काठमाडौं । नियमित महाधिवेशनसम्म सभापति शेरबहादुर देउवाको भूमिका र स्थान के हुने भन्ने विषयमा देखिएको विवाद अझै टुंगोमा पुग्न सकेको छैन ।
छलफलमा सहभागी नेताहरुका अनुसार विशेष महाधिवेशन पक्षधरले सभापति देउवाको भूमिका अब पार्टीमा सक्रिय खालको हुन नहुने, निर्वाचनमा एमालेसँग गठबन्धन गर्न नहुने, विशेष महाविधेशनको स्वामित्व लिनुपर्नेलगायतका प्रस्ताव राखेका थिए ।
“बाँकी प्रस्तावमा विवाद छैन, तर सभापतिको भूमिका के हुने भन्ने विषयमा कुरा मिल्न बाँकी रहेको छ,” बैठकमा सहभागी नेता गुरु घिमिरेले भने ।
नियमित महाधिवेशनसम्म अर्थात् अन्तरिम समयको नेतृत्वमा देउवालाई के गर्ने ? भन्ने विषयमा छलफल भएको थियो ।
विशेष महाधिवेशन पक्षधरका नेताहरुले नयाँ नेतृत्व चयन गरेर जाने र सभापति देउवालाई विस्थापित गर्नुपर्ने धारणा राखेका थिए ।
देउवाले पार्टीको नियमित महाधिवेशन उद्घाटन सभापतिकै हैसियतमा गर्ने हो भने त्यसबेलासम्म कुनै पनि गतिविधिमा सक्रिय हुन नहुने प्रस्ताव विशेष महाधिवेशन पक्षधरको थियो ।
त्यसमा कुरा मिल्न बाँकी रहेको नेताहरुले बताएका छन् ।
तर संस्थापन पक्षले सभापतिका विषयमा निर्णय गर्न नमानेको नेताहरुले बताएका छन् । बैठकमा सहभागी नेता प्रदिप पौडेलका अनुसार वार्ता टुंगिएको पनि होइन भंग भएको पनि होइन ।
“नेताहरु सभापतिलाई भेट्न जानुभएको छ, आउनुभएको छैन,” पौडेलले भने ।
संस्थापन पक्षले एमालेसँग गठबन्धन नगर्ने कुरामा लचिलो भएको छ भने विशेष महाधिवेशनको स्वामित्व पनि केही भाषा मिलाएर लिन सकिने धारणा राखेको छ । अर्का एक नेताका अनुसार देउवासमूह बिहानसम्म कुनै पनि कुरा सुन्न तयार थिएन । अहिले सभापतिको प्रस्ताव पनि लिएर छलफलका लागि गएको छ ।
प्रकाशित मिति: २९ पुस २०८२, मंगलबार
प्रतिक्रिया