काठमाडौं । नेपाली कांग्रेसको विशेष महाधिवेशन अब निर्वाचनतर्फ मोडिएको छ। रातभरका वार्तामा सभापति शेरबहादुर देउवा नेतृत्व छोड्न तयार नभएपछि पार्टीको नीति र नेतृत्व परिवर्तन निर्वाचनमार्फतै हुने भएको छ।
विशेष महाधिवेशन प्रचारप्रसार उपसमिति संयोजक सुवास पोखरेलले संस्थापनले अन्तिम वार्ताको प्रयास गरिरहेकाले त्यसलाई मध्यनजर गर्दै कार्यक्रम अगाडि बढाइएको बताए। उनले भने, “हाम्रो निर्वाचनको तालिका यथावत् छ। सहमति नजुटे हाम्रो कार्यक्रम अघि बढ्छ।”
पोखरेलले सभापति देउवा नेतृत्व छोड्न तयार नभएको र विशेष महाधिवेशनको अपनत्व लिन संस्थापन तयार भए पनि त्यो आफूहरूका लागि स्वीकार्य नरहेको बताए। उनले देउवाले पार्टी नेतृत्व छोडेर व्यक्तिगत जीवनमा केन्द्रित हुनुपर्नेमा जोड दिए र अब निर्वाचन प्रक्रियामात्र बाँकी रहेको स्पष्ट पारे।
महामन्त्री गगनकुमार थापा र विश्वप्रकाश शर्माको प्रतिवेदन मंगलबार साँझ पारित भएपछि बन्द सत्र समापन गरिएको छ। विशेष महाधिवेशनका नेताहरूले पदाधिकारीको खाका समेत तयार गरिरहेका छन्। बुधबार बिहान वार्ताका ढोका खुला राखिँदै निर्वाचन प्रक्रिया पनि अघि बढ्ने भएको छ। मनोनयन दर्ताका लागि बिहान ८:१५ देखि ९:१५ बजेसम्म समय थप गरिएको छ।
प्रकाशित मिति: ३० पुस २०८२, बुधबार
प्रतिक्रिया