काठमाडौं । रामेछाप जिल्लाको सेलेघाट क्षेत्रमा मंगलबार भएको यात्रुवाहक बस दुर्घटनामा ज्यान गुमाउनेको संख्या १२ पुगेको छ ।
काठमाडौँबाट ओखलढुङ्गातर्फ जाँदै गरेको प्रदेश–३–०१–००५ ख ९९७५ नम्बरको यात्रुवाहक बस अनियन्त्रित भई तामाकोशी नदीमा खसेको थियो । दुर्घटनामा परेका मृतकमध्ये ११ जनाको पहिचान खुलिसकेको छ भने एक जनाको सनाखत हुन बाँकी रहेको प्रहरीले जनाएको छ ।
दुर्घटनापछि बस चालकलाई प्रहरीले नियन्त्रणमा लिएको छ । रामेछापको मन्थली नगरपालिका–११ निवासी ३१ वर्षीय सुशान्त थापामगरलाई पक्राउ गरिएको रामेछापका प्रहरी नायब उपरीक्षक (डीएसपी) भोला भट्टले जानकारी दिए ।
दुर्घटनामा चालकको मेरुदण्डमा चोट लागेको भए पनि उपचारपछि अस्पतालबाट डिस्चार्ज गरिएको प्रहरीले जनाएको छ ।
प्रकाशित मिति: २७ माघ २०८२, मंगलबार
प्रतिक्रिया