एजेन्सी । इरानले अमेरिकाले प्रस्ताव गरेको ४८ घण्टे युद्धविरामको सुझाव अस्वीकार गरेको छ। सरकारी समाचार एजेन्सी ‘फर्स’का अनुसार उक्त प्रस्ताव बिहीबार एक मित्र राष्ट्रमार्फत तेहरानसम्म पुर्याइएको थियो।
वाशिङ्टनले युद्धविरामका लागि कूटनीतिक पहल तीव्र बनाएको जनाइएको छ। विशेषतः कुवेतको बुबियान टापुस्थित अमेरिकी सैन्य गोदामलाई इरानले निशाना बनाएपछि उत्पन्न अवस्थालाई ध्यानमा राख्दै अमेरिका सक्रिय भएको स्रोतहरूको भनाइ छ। उक्त आक्रमणले क्षेत्रीय सुरक्षा अवस्थालाई थप जटिल बनाएको थियो।
फर्सको विश्लेषणअनुसार प्रस्ताव अमेरिकी–इजरायली सैन्य कारबाही र त्यसबाट उत्पन्न क्षेत्रीय तनावसँग सम्बन्धित थियो। इरानको सैन्य क्षमताबारे गरिएको गलत आकलनले अमेरिकी पक्षलाई अप्ठ्यारोमा पारेको दाबी पनि समाचारमा गरिएको छ।
युद्धविराम प्रस्तावबारे इरानले औपचारिक लिखित प्रतिक्रिया नदिए पनि युद्धमैदानमा आक्रमणलाई निरन्तरता दिँदै आफ्नो असहमति स्पष्ट पारेको बताइएको छ। यसलाई इरानको दृढ सैन्य अडानका रूपमा व्याख्या गरिएको छ।
गत फेब्रुअरी २८ मा अमेरिका र इजरायलले संयुक्त रूपमा तेहरानसहित इरानका विभिन्न प्रमुख शहरमा आक्रमण गरेका थिए। त्यसक्रममा उच्चस्तरीय सैन्य कमाण्डर तथा केही सर्वसाधारणको ज्यान गएको उल्लेख गरिएको छ। त्यसपछि इरानले इजरायल र पश्चिम एसियामा रहेका अमेरिकी हित तथा सम्पत्तिलाई लक्षित गर्दै मिसाइल र ड्रोन प्रहार सुरु गरेको थियो।
यी घटनाक्रमले इरान, अमेरिका र इजरायलबीचको तनावलाई थप चर्काएको छ। युद्धविराम प्रस्ताव अस्वीकार गरिएसँगै आगामी दिनमा सैन्य तथा कूटनीतिक दुवै मोर्चामा चुनौती बढ्ने संकेत देखिएको छ।
प्रकाशित मिति: २१ चैत्र २०८२, शनिबार
प्रतिक्रिया