काठमाडौं। भेनेजुएलाको उत्तर–मध्य क्षेत्रमा बुधबार आएको दुई शक्तिशाली भूकम्प पछि जनधनको ठूलो क्षति भएको छ। भूकम्पमा परी हालसम्म ९२० जनाको मृत्यु भएको पुष्टि भएको छ भने ३ हजार ३६० जना घाइते भएका छन्।
यूएसजीएसका अनुसार एक मिनेटभन्दा कम अन्तरमा ७ दशमलव २ र ७ दशमलव ५ तीव्रताका दुई भूकम्प मापन गरिएको थियो। भूकम्पपछि २० भन्दा बढी पराकम्पसमेत रेकर्ड भएका छन्।
जर्ज रोड्रिगेजका अनुसार उद्धार तथा राहत कार्य जारी रहेकाले मृतकको संख्या अझ बढ्न सक्ने अनुमान गरिएको छ।
भूकम्पबाट बचेकी मिकाएला ओभेलारले घटनाको क्षण अत्यन्त भयावह रहेको बताइन्। उनका अनुसार साँझको समयमा धेरै परिवार घरमै रहेका बेला पहिलो धक्का महसुस भएको थियो। त्यसको केही क्षणमै अझ शक्तिशाली दोस्रो भूकम्प आएपछि जमिन लगातार हल्लिएको, सडक चर्किएको आवाज सुनिएको र मानिसहरू ज्यान जोगाउन भागदौड गरेको दृश्य देखिएको थियो।
प्रभावित क्षेत्रमा खाद्यान्न आपूर्ति अवरुद्ध भएको छ भने विद्युत्, खानेपानी तथा अन्तरजाल सेवामा गम्भीर असर परेको जनाइएको छ।
राजधानी नजिक रहेको सिमोन बोलिभार अन्तर्राष्ट्रिय विमानस्थल पनि भूकम्पबाट गम्भीर रूपमा क्षतिग्रस्त भएको छ। विमानस्थल बन्द गरिएपछि सबै व्यावसायिक उडान स्थगित गरिएको छ।
भूकम्पका कारण १७२ जना अझै भग्नावशेषमुनि फसेका छन् भने ३ हजार ७ जना विस्थापित भएका छन्। ३८३ वटा भवनमा क्षति पुगेको छ, जसमा १३ अस्पताल र २५ व्यापारिक केन्द्र पनि समावेश छन्। साथै, १ हजार २ वटा अन्य संरचनामा विभिन्न स्तरको क्षति पुगेको बताइएको छ।
शुक्रबार दिउँसोसम्म ८७१ जना अन्तर्राष्ट्रिय उद्धारकर्मी राहत तथा उद्धार कार्यमा सहयोग गर्न भेनेजुएला पुगेका छन्।
डेल्सी रोड्रिगेजले सबैभन्दा बढी प्रभावितमध्ये एक ला ग्वाइरा राज्यलाई उद्धार कार्य प्रभावकारी बनाउन तथा सुरक्षा सुनिश्चित गर्न सैनिक नियन्त्रणमा राखिएको घोषणा गरेकी छन्।
प्रकाशित मिति: १३ असार २०८३, शनिबार
प्रतिक्रिया