काठमाडौं । नेपाली राजनीति, न्यायालय र सुरक्षा प्रशासनमा एकपछि अर्को विवाद सतहमा आइरहेका बेला प्रधानमन्त्रीले एकैपटक सबै मन्त्रालयका ६० जना सचिवहरूलाई प्रधानमन्त्री तथा मन्त्रिपरिषद्को कार्यालयमा बोलाएर बैठक राखेपछि राजनीतिक तथा प्रशासनिक वृत्तमा अनेक अड्कलबाजी सुरु भएको छ। सरकारको नियमित कार्यसम्पादन समीक्षा मात्रै हो वा विकसित घटनाक्रमबीच प्रधानमन्त्रीले प्रशासनिक संयन्त्रमार्फत कुनै महत्त्वपूर्ण सन्देश र निर्णय दिन खोजेका हुन् भन्ने प्रश्न पेचिलो बनेको छ।
सिंहदरबारस्थित प्रधानमन्त्री तथा मन्त्रिपरिषद्को कार्यालयको सगरमाथा हलमा जारी बैठकको औपचारिक कार्यसूचीमा सरकारी निर्णय कार्यान्वयनको अवस्था, चालु आर्थिक वर्षको कार्यप्रगति, बेरुजु फर्छ्योट, चाडपर्व लक्षित शान्ति सुरक्षा र बजार अनुगमनलगायत विषय समेटिएका छन्। तर बैठकको समय, सहभागीको दायरा र पछिल्लो राजनीतिक घटनाक्रमलाई एकसाथ जोडेर हेर्दा यसलाई सामान्य प्रशासनिक समीक्षामा मात्रै सीमित गरेर बुझ्न कठिन देखिन्छ।
विशेषगरी इनम सापकोटा प्रकरणले न्यायालयदेखि राजनीतिक नेतृत्वसम्मको सम्बन्धबारे प्रश्न उठाइरहेको, सत्तारूढ राष्ट्रिय स्वतन्त्र पार्टीभित्र शक्ति सन्तुलनको बहस चर्किएको, प्रहरी नेतृत्व र प्रधानमन्त्री सचिवालयबीच विवादका चर्चा सार्वजनिक भइरहेको तथा न्यायाधीशहरूमाथि महाभियोगको तयारीबारे बहस चलिरहेका बेला प्रधानमन्त्रीले सम्पूर्ण प्रशासनिक नेतृत्वलाई एकै ठाउँमा उपस्थित गराउनुलाई अर्थपूर्ण रूपमा हेरिएको छ।
त्यसमाथि प्रधानमन्त्रीको पछिल्लो सामाजिक सञ्जाल अभिव्यक्तिले पनि राजनीतिक वृत्तमा थप प्रश्न जन्माएको छ। आइतबार प्रधानमन्त्रीले लेखेका थिए, ‘सही समय आएपछि सबैको गलत समय आउँछ, एक-दुई जना उम्किन्छु भनेर सपना नदेखे हुन्छ।’ प्रधानमन्त्रीले उक्त अभिव्यक्ति कसलाई लक्षित गरेर दिएका हुन् भन्ने स्पष्ट पारेका छैनन्। तर अनुसन्धान, जवाफदेहिता र राज्यका विभिन्न निकायमा देखिएका विवादको पृष्ठभूमिमा आएको यो अभिव्यक्तिलाई सामान्य राजनीतिक टिप्पणीका रूपमा मात्रै लिन नहुने विश्लेषण गरिएको छ।
प्रकाशित मिति: १६ कार्तिक २०८३, सोमबार
प्रतिक्रिया