ट्रम्पको इरानमाथि आक्रमणपछि इरानी जनतालाई सशक्त आह्वान : ‘सत्ता कब्जा गर’

काठमाडौं। अमेरिका र इजरायलको संयुक्त सैन्य आक्रमणपछि अमेरिकी राष्ट्रपति डोनाल्ड ट्रम्पले इरानी जनतालाई प्रत्यक्ष अपिल गर्दै इरानी शासनविरुद्ध विद्रोह गर्न आह्वान गरेका छन् । उनले इरानी नागरिकहरूलाई ‘तपाईंहरूको सरकारलाई नियन्त्रणमा लिनुहोस्’ भन्दै यो अवसर धेरै पुस्तासम्म नआउने बताएका छन् ।

ट्रम्पले आफ्नो सामाजिक सञ्जाल प्लेटफर्म ट्रुथ सोसलमा जारी गरेको आठ मिनेट लामो भिडियो सन्देशमा भने, “अमेरिकाले हालै इरानमा प्रमुख युद्ध अभियान सुरु गरेको छ । यसको उद्देश्य अमेरिकी जनताको सुरक्षा सुनिश्चित गर्नु र इरानी शासनबाट उत्पन्न आसन्न खतरालाई हटाउनु हो ।”

उनले इरानी जनतालाई सम्बोधन गर्दै थप भने, “तपाईंहरूको सरकारलाई नियन्त्रणमा लिनुहोस् । यो सम्भवतः धेरै पुस्तासम्म तपाईंहरूको एक मात्र अवसर हुनेछ । धेरै वर्षदेखि तपाईंहरूले अमेरिकाको सहयोग माग्दै आउनुभएको छ, तर कहिल्यै पाउनुभएको छैन । यसअघि कुनै अमेरिकी राष्ट्रपति आज म गर्न तयार भएको जस्तो काम गर्न इच्छुक थिएन । अब तपाईंहरूसँग यस्तो अमेरिकी राष्ट्रपति छ जसले तपाईंहरूलाई चाहिएको कुरा दिइरहेको छ, त्यसैले अब तपाईंहरूको प्रतिक्रिया के हुन्छ, हेरौँ ।”

ट्रम्पले इरानी शासनलाई ‘धेरै कठोर र खतरनाक समूह’ को संज्ञा दिँदै इरानलाई कहिल्यै पनि आणविक हतियार प्राप्त गर्न नदिने प्रतिबद्धता दोहोर्‍याए । उनले भने, “इरानले आफ्नो आणविक कार्यक्रमलाई पुनर्जीवित गर्ने प्रयास गरेको छ र लामो दूरीका क्षेप्यास्त्रहरू विकास गरिरहेको छ, जसले अमेरिका र यसका सहयोगीहरूका लागि गम्भीर खतरा निम्त्याउँछ । हामी उनीहरूको क्षेप्यास्त्र नष्ट गर्नेछौं र उनीहरूको क्षेप्यास्त्र उद्योगलाई जमिनमा पुर्‍याउनेछौं ।”

उनले इरानको नौसेनालाई पूर्ण रूपमा ध्वस्त पार्ने र तेहरानले आणविक हतियार प्राप्त नगरोस् भन्ने सुनिश्चित गर्न अमेरिका प्रतिबद्ध रहेको बताए । साथै इरानी सेना तथा इस्लामिक रिभोलुशनरी गार्ड कर्प्स (IRGC) लाई आत्मसमर्पण गर्न आह्वान गरे ।

ट्रम्पको यो भिडियो सन्देश आक्रमणको केही घण्टापछि सार्वजनिक भएको हो । आक्रमणमा तेहरानको राष्ट्रपति भवन (पास्तुर क्षेत्र), प्रमुख विमानस्थल, क़ोम, इस्फहान लगायतका शहरहरूका सैन्य तथा रणनीतिक स्थलहरू लक्षित गरिएका थिए । इरानी सर्वोच्च नेता अयातोल्लाह अली खामेनीलाई सुरक्षित स्थानमा सारिएको रिपोर्ट आए पनि उच्च पदस्थ अधिकारीहरूको हताहतबारे अहिलेसम्म पुष्टि भएको छैन ।

इरानले यस आक्रमणलाई ‘युद्धको घोषणा’ का रूपमा लिएको छ र ध्वंसात्मक जवाफी कारबाहीको चेतावनी दिइसकेको छ । मध्यपूर्वमा तनाव चरममा पुगेको छ भने अन्तर्राष्ट्रिय समुदायले तत्काल युद्धविराम तथा संयमको अपिल गरिरहेको छ । संयुक्त राष्ट्रसङ्घको सुरक्षा परिषद्ले आपत्कालीन बैठक बोलाउने तयारी गरेको छ ।

ट्रम्पको यो अपिलले इरानी जनतामा विद्रोहको आह्वान गर्ने प्रयासका रूपमा हेरिएको छ । तर इरानको कडा सुरक्षा व्यवस्था तथा शासनको नियन्त्रणका कारण जनविद्रोहको सम्भावना तत्काल कठिन देखिएको छ । स्थिति अत्यन्त संवेदनशील बनेको छ र इरानको जवाफी कारबाहीले विश्वव्यापी प्रभाव पार्न सक्ने विश्लेषकहरू बताउँछन् ।

प्रकाशित मिति: १६ फाल्गुन २०८२, शनिबार