काठमाडौं । प्रधानमन्त्री केपी शर्मा ओली आज आयोजना हुने अन्तर्राष्ट्रिय महिला फुटबल च्याम्पियनसिपको फाइनल खेल अवलोकन गर्न दशरथ रंगशाला जाने भएकाछन्।
प्रधानमन्त्रीको सचिवालयका अनुसार नेपाल र म्यानमारबीच साँझ ६ बजे हुने फाइनल खेल हेर्न उनको उपस्थिति रहनेछ।
चार राष्ट्र सम्मिलित यस प्रतियोगितामा नेपाल र म्यानमार अपराजित रहँदै फाइनलसम्म पुगेका हुन्। दुवै टिमले लेबनान र किर्गिस्तानलाई पराजित गर्दै एकअर्कासँग बराबरी खेलेका थिए।
फाइनल खेलअघि प्रधानमन्त्री ओली ललितपुरको पुल्चोकस्थित सेन्ट्रल भेन्युमा जारी “केपी ओली कप” अन्तर्गत खेलाडीहरूसँग भेटघाट गर्ने कार्यक्रम रहेको छ।
त्यसपछि उनी सैनिक मञ्च टुँडिखेलमा आयोजना हुने महाशिवरात्रि तथा नेपाली सेनाको २६२औं सेना दिवस समारोहमा सहभागी भई फाइनल खेल हेर्न जाने कार्यतालिका रहेको छ।
प्रकाशित मिति: १४ फाल्गुन २०८१, बुधबार
प्रतिक्रिया